04年榮休的無綫化妝大師陳文輝，今年81歲，近日傳病重入院，據收到嘅消息，煙齡不淺的輝哥一個月前發現患上癌症，目前喺港島區一間醫院接受治療。

消息稱家人擔心輝哥年紀大，接受化療會好辛苦，所以決定安排輝哥接受中藥治療，目前輝哥情況都算穩定。

自從輝哥發現癌症之後，家人一直悉心照顧，尤其是輝哥結婚19年嘅第二任太太Deborah，夫妻情重。

Deborah今日接受電話訪問，語氣平靜：「輝哥都一把年紀啦，有病係好理所當然。」是否罹患肺癌？輝嫂就說：「依家癌症喺現代人都好普遍，唔係剩係佢，唔需要太過驚慌，係咪先。癌症喺中醫腫瘤科年紀大或者後生都一樣有，依家癌症真係好普遍。」不作正面回應。

至於輝哥近日情況，輝嫂表示：「佢OK嘅，胃口當然冇以前後生咁食得啦，佢始終都係病人。我哋依家同佢一齊打緊仗，我哋都會鼓勵佢食嘢呀、心情開朗呀，我覺得最緊要佢心情開朗囉，你打任何仗都一定咁。我都同佢講加油，大家加油。佢年紀大，打呢個仗一定比後生嗰啲吃力啲，我哋家人、朋友都比最好嘅支持佢。我今日都有睇報紙寫佢，又唔係講得咁嚴重嘅，將來嘅嘢冇人知。」

另輝哥幼子陳志達今日表示多謝各界對輝哥關心，不過暫時不方便太多朋友到醫院探輝哥：「一來我哋想俾佢好好休息，二來日日都有朋友嚟探輝哥，都擔心影響到其他病人。」

(蘋果日報 / 明報)