藝人莊思明昨日在社交網上載千字文吐苦水，事緣她應朋友邀請到泰國出席一個宴會，因為由朋友負責安排航班和酒店，故自己沒有再特別多加要求下，乘搭了國泰航空的經濟客位起行，但在航班中遇到不快事！思明揚言整件事情「唔係我想像中咁簡單！」，更與多位網民引起連場駡戰….
她在FB發長文：「我今朝乘坐嘅航班係國泰嘅CX 619，我坐位係43D，我係航班中途㩒（撳）咗個叫空中服務員嘅燈因為我想借支筆填入境表。我㩒（撳）咗一次好耐都冇人嚟於是我就睇睇我坐位上嘅燈，咦，點解熄咗但又冇人問我有咩需要嘅？唔緊要，我再㩒（撳）過，點知又係俾（畀）人熄咗。之後我㩒（撳）第3次，今次我就刻意向後啤睇吓會唔會睇到究竟發生咩事，終於俾（畀）我睇到啦，原來有個空姐係我後面熄咗我盞燈然後就擰轉面行開咗！佢係完全冇問過我有咩需要就行開咗，我想叫都叫唔住佢！」
當她一而再再而三都被忽略的時候，及親眼看到空中服務員的行為，她說：「我開始明白事情可能並唔係我想像中咁簡單！跟住我再㩒（撳）第4次，終於有個女仔急急腳走嚟。填完表後我諗咗一陣剛剛發生嘅事，我覺得有需要同機上嘅高級空中服務員表達，因為我唔希望呢種不快嘅事情會發生喺其他人身上。」
之後有位高級的男空中服務員親自向莊思明道歉，她稱該名空少不停跟自己說「唔好意思」：「同埋佢不停來來回回咁幫我揾係邊個空姐咁唔專業。過咗幾分鐘左右個男空中服務員過嚟搵我，佢同我講佢已經同經理講咗件事同埋已經發現咗係邊個，佢問我想點處理。」
最後莊思明說：「如果國泰嘅高層想了解更多關於這次事件嘅詳情，我絕對歡迎你哋同我聯絡！」
莊思明Facebook全文
留言一出，當然只見到一面倒支持莊思明的人留言，有網民將事件與近日的「反送中運動」扯上關係，其間只見到有一個持不同意見的網民留言：「莊小姐究竟係咪出名到全香港人都認識？仲要戴住口罩嘅情況下，國泰服務水平下降已經好多年，不過如因為服務唔好=YC（黃絲），又牽強咗啲！」
最後莊思明寸爆地說：「呢個唔關佢認唔認得我事，係佢嘅服務態度有問題，請了解清楚我投訴緊咩事。」
另有人質疑莊思明打長文的目的，明言「打咁多字出嚟博乜？」但莊思明沒有退讓，堅持「錯不在我」。
（綜合報道）
