陳豪日前從爆發不明原因病毒性肺炎的武漢返港後，昨晚到電視城參與慈善騷《慈善星輝仁濟夜》演出。
Ali跟陳豪同台演出，她表示原本打算靠晒對方，但演出前仍未見到他，講到陳豪剛從爆發不明肺炎疫情的武漢返港，Ali即一臉驚訝地說：「我一陣仲企佢隔籬喎！如果佢有咩唔舒服，我就幫佢頂一頂啦！」問到會否擔心被傳染？碰巧此時陳豪經過，Ali即表示驚驚！其後他們被要求合照，兩人大放笑彈，Ali起初搞笑背住陳豪，陳豪即搭Ali膊頭，Ali說：「我嚟做善事㗎咋！唔好搞我呀！」
陳豪表示武漢演出一早安排，出發前兩天才知道有肺炎疫情，衡量過風險後，決定繼續行程，自己也有注重個人衛生：
「坦白講，我去到那邊沒什麼，情況沒有話好犀利，雖然現在剛開始，但不是我們睇到那麼大件事，可能香港人經歷過SARS都會小心一點，始終家中有小朋友，我自己都比較安全、穩陣，避免跟觀眾們握手，除了上台表演、搭飛機，其他時間都留酒店房，早餐都在房內食，沒外出去其他地方。」
他又指身體狀態正常，不過回家後亦立即沖涼、洗衫，消毒全身，然後才擁抱子女。
（綜合報道）
