【請到視后做大妗姐】C君愛的宣言勁感動：天頤婚前一直都唔畀我叫老婆

組合農夫成員C君今日迎娶拍拖五年女友、電台DJ黃天頤，今晚假中環四季酒店擺喜酒。中午時穿上傳統馬褂的C君，與一眾星級兄弟團到酒店接新娘，兄弟團陣容鼎盛，包括陸永、蕭正楠、黃翠如、洪永城等…

兄弟團到達新娘房時第一時間付上開門利是，一眾姊妹不斷叫價，一度提出九千九百九十萬的銀碼，蕭正楠立刻向各兄弟籌利是錢，陸永更高：「嘩，真係厚到利是封都擺唔落呀！」原來眾人用銀紙包紙巾「裝假狗」，怎料被姊妹們發現起哄，經過一輪議價後，C君以一封「開心大利是」順利過關。

之後C君與兄弟團要接受遊戲考驗，先要穿上美少女戰士服飾扮變身，之後C君又要戴上眼罩口含唇膏為兄弟扮靚，兄弟們再嘴貼嘴傳心心膠片。

最後一個遊戲就考驗兄弟們體力，邊口含威化餅邊做掌上壓，C君玩到瞓晒地，新郎哥最終被噴到成頭餅碎。

到愛的宣言環節，C君表示：「天頤婚前一直都唔畀我叫老婆、太太，就算有人叫佢做C君老婆，佢都第一時間否認，強調只係我女朋友，不過過咗今日可以每日叫你老婆啦！一直以嚟好多新人都係讀愛的宣言，但係宣言係可以改或者唔算數，我自己度咗一段愛的誓言，如果做唔到就天打雷劈。」

天頤在房內聽到老公夾雜文言文的誓言既感動又開心，不過一對新人表現甚爲含蓄，C君只輕錫老婆面頰一下。此外擔任大妗姐的唐詩詠可能未背熟台詞，出現食螺絲的情況，場面十分搞笑。