社會氣氛日漸緊張，每日面對突如其來的催淚彈、催淚煙，萬一家中小朋友中了TG應該怎麽辦？最近網上有媽媽Group就與大家分享處理小朋友中TG的做法。
内容先是點出很多父母都做錯了
「中TG後，大人千萬不能這樣用手掂小朋友對眼，你隻手有TG微晶體，係咪想痛死佢？亦不能讓小朋友捽眼，捽咗TG微晶體入眼，火燒咁痛多幾錢重，對眼唔駛要，有排睇專科，必要時綁起佢都咁話。」
各位家長應該這樣做
步驟是…
1) 一手抱起小朋友，捉實佢雙手，奪命狂奔離開現場
2) 搵水源 (包括公廁、商場廁、舖頭廁)
或買樽裝水、向食肆或路人求救比水你 (除咗水，津路烏龍茶、奶都得)
3) 洗眼
– 大人洗咗自己隻手先
– 小朋友烏低身，左右輪流打側頭，逐隻眼倒水沖，沖左眼的話左眼向地右眼向天，相反亦然。
– 盡量唔好比洗眼啲水流落條頸或個身，啲水流到邊，會乸到邊。
– 每隻眼原理上最好沖15分鐘，但現場附近若未係完全安全、未係空氣零TG污染的話，求其啦，都唔駛咁耐，反正你沖完而走返屋企時又係會沾染TG毒物，到時一樣。安全至沖耐啲。
4) 洗臉、頸、手、腳等外露位置
– 都係沖，唔好抹，最多用紙巾*印*。記住*不能抹！*
– 有番皂有皂液就用，會有點幫助。冇就算。
– BB仔 或 太近中太嚴重的TG，必要時可行情況下，除晒小朋友/BB啲衫，去成個BB全身沖水 (啲衫有污染請用膠袋入起佢隔離，或掉咗佢)。當然我明白响街好難，赤裸亦唔知點離開。
5) 返到屋企大洗
– 除晒所有衫，將小朋友放在shower下大洗。(不能沖bath)
– 小朋友的衫褲鞋襪袋，一係掉，一係膠袋入住隔離。唔好周圍擺，將毒物擴散。
– 水溫盡量凍，越熱會越乸
– 洗頸以上的臉部、頭髮時，一樣要好似洗眼咁烏低身、側頭。頭髮會沾有勁多TG，洗出嚟嘅水，若流過身體會乸。
– 用返平日小朋友用的洗頭水、皂液便可
– 口腔要用水漱口、鼻孔一係用洗鼻器一係就咁用水沖得幾多得幾多、仲有耳孔外耳殼等，也不能忽略
– 換過晒乾淨衫
* 小朋友唔再痛，唔代表已經冇毒物遺留，唔代表已經冇事或安全 *
* 若小朋友响大洗同休息後幾個鐘，仲係痛，咁可考慮睇醫生。但出入務必要注意局勢和安全，再受襲擊多次就大鑊。*
* 我覺得最好平日同小朋友講定先，做吓briefing，甚至玩演習，咁萬一中咗TG時，佢痛到發癲時，佢有個心理準備，知道大人會點樣幫佢，佢會合作啲和冇咁panic（驚慌） *
