喺2011年約滿無綫嘅宣萱（Jessica），最近憑《不懂撒嬌的女人》Mall姐一角熱爆全城，仲令唔少人重拾返煲劇潮，Jessica日前喺銅鑼灣接受訪問，Jessica一坐低已經話自己唔知已經做咗幾多個訪問，搞到本來安排好嘅假期都要取消，雖然把口話真係要停一停，但係其實睇得佢係好開心！

講到呢個令同事患上「斯德哥爾Mall姐症」嘅Mall姐，Jessica話：「唔知幾多年冇聽過人追劇，有啲朋友睇咗第一集，已經問我同文龍係咪結婚，連銀行啲職員都message我，我仲試過有啲唔識嘅人走埋嚟同我講，佢啲上司就係咁樣嘅人，可能未去到唔俾人去洗手間，但係情況都幾嚴重！」

或者正如網民所講，呢套劇最驚喜嘅地方，就係冇咗一貫膠劇作風，劇情同節奏都好快，就算係一啲小角色，都會有發揮機會，同唐詩詠爭仔嘅白雲，喺劇集初期亦講過拍呢套劇覺得好受尊重，幕後啲工作人員個個對佢好好，Jessica聽完之後話：「其實當日接呢套劇係呢個團隊好認真做嘢，唔會話因為你係小角色，就唔會理你，由你自由發揮，佢哋會覺得無論係大與小，每一個角色都重要，好似Mall姐咁，如果冇嗰班做office嘅同事去撐，冇佢哋見到你個樣好鬼驚，Mall姐又唔會咁突出，係大家互相幫忙，成件事立體好多。」

對於演員嚟講，當然係好事，Jessica話：「其實每一個演員都想有機會發揮，只係睇吓你有冇遇到呢個機會，當有嗰陣，起碼俾佢感受嗰份真誠，得與唔得係睇佢自己，但係呢份尊重係好重要。」之後Jesscia仲有感而發話：「我離開公司5年，當年係因為欠缺咗呢份尊重，所以離開，5年後得到番一個尊重加上劇本角色吸引，咪再合作！」

佢仲話：「 因為我遇到呢份感覺，所以我明白，唔受尊重嘅時候咁咪行囉，我唔係可以企喺度俾你侮辱，呢條路唔行，咪行第二條路，唔會有絕路，嗰份感覺真係好緊要，對演員嚟講今次可以有呢個機會，遇到嘅團隊，大家有咗一份希望。」

Jessica繼續話：「我哋做咗咁多年，希望拍番啲有質素好嘢，而唔係柴娃娃返嚟，逗份人工就走喇！如果唔係當日唔會走，我大可以繼續做，最好寫少啲我啲戲，少啲返工，又係收你咁多錢，但係我嘅心態唔係，返得嚟係做啲質素嘅嘢俾人睇，而呢啲嘢唔係我一個人可以做，係要大家一齊做，呢個job係team work，好好玩，唔會係靠一個人。」

事隔5年回巢拍劇，迴響又確實比之前大，唔知Jessica又會唔會覺得當年嘅決定冇錯呢？佢話：「我覺得啱，因為冇意思，我自己做嘢其實好簡單，係一個感覺，當你去到一個地步，覺得公司對演員完全冇咗份尊重，當然唔止對我，因為我之前聽到其他演員走，其實咪又係嗰兩個字，尊重，好多都因為係冇尊重，聽完之後我冇諗過自己都會發生呢啲事，所以好明感受，第一個感覺係要走，除非我對自己冇要求，嗰剎那覺得冇所謂，公司未必可以俾到嗰份驚喜，打份工冇乜所謂，有糧出安份守己喇，但係我唔係呢類人，希望可以keep住有進步。」