45歲的馬國明失戀，今日有報道指馬國明承認與黃心穎已經分手，並將對方降呢做回「朋友」。今日中午12時半，馬國明獨自駕車離開太古城寓所，當時未有化妝，表情木訥，對記者提問未有回應。
今日下午3時，馬國明與新劇《白色強人》拍檔李佳芯一齊在將軍澳出席活動，一身粉藍色西裝好醒神，有台上與Fans互動亦有講有笑。活動後，馬國明即成為焦點，被大批傳媒圍住訪問，被取笑滿頭大汗，身邊工作人員護航說：「佢成日係咁。」
馬國明在訪問中多次希望網民言論別過激，希望給予心穎一個機會，問到是否想幫她復出工作？他說：「唔係幫，只係件事大家反應過激囉，有啲網民，始終係感情事，我都可以同佢繼續係朋友，點解大家反應咁激呢？！只係大家係咁啄住佢嚟鬧，件事過咗咁耐，佢都知錯啦！我之前回應都講咗，佢後生仲有好多路要行，大家無謂呢件事周旋啄住佢。」
問到是否回復筍盤？他說：「唔關事，呢啲唔講，希望件事盡快平息，過咗好耐，唔使周旋呢啲問題。」對於有沒有聯絡心穎，有沒有見過對方，馬國明都避談說：「唔講，所有嘢唔答，再答只會問得多啲。其實你哋都知佢而家係邊啦，報紙寫咗佢去第二度讀書嘛。」仍是女朋友關係？他苦笑說：「唔答嘞，唔知點解大家要劃得條線咁實，其實我真係冇咩答。」
馬國明在報道中承認得知「安心偷食」後好憤怒，他澄清：「係有啲嬲，但唔可以用憤怒嚟形容，佢知自己犯錯。而家仲嬲？過咗好耐仲嬲？大家仲係朋友，總之大家唔使咁激動，冇必要做唔到朋友。」對於現時是否已ready一段新感情？馬國明仍是一句：「唔答。」如果心穎要求翻撻？他說﹕「假設唔答。」想不想再試多一次？他說﹕「唔答嘞！」
問到跟心穎分手後，是否已準備接受一段新感情？馬國明稱：「我唔答喇，唔答喇呢啲，冇話準備好未。」若然心穎想復合又是否接受？馬國明即笑說：「呢啲假設性嘅問題唔答喇！Thank you，辛苦晒！」問到他倆是否有復合機會？他亦話：「唔答喇，都冇咩可以答，我冇咩答喇，大家都係朋友。」提到再拍拖時會否更小心，以及更關注女友行蹤？馬國明就話：「呢啲將來嘅事，唔答喇，多謝大家關心。我諗都係專心做嘢先啦，大家都冇咩答喇，做好自己手頭上嘅工作先。」
現已回復單身的馬國明，又指從來不認為自己是筍盤：「大家畀面成日叫筍盤，其實就唔係真係咁筍嘅，多謝大家畀面！」問到事情發生後，有沒有跟心穎傾過如何面對傳媒？馬國明說：「其實第一次回應當日我已經講晒，亦都唔係好想再講，係囉都冇咩再可以答，其實我而家答嘅基本上都係套番第一次嘅答案嚟答，只不過大家有自己嘅解釋，就再解釋落去，我都話我控制唔到報紙、傳媒嘅標題，但我只可以話我哋仲係朋友，希望大家可以畀個機會佢。」問到情傷好番未？馬國明就引用劇集中的醫生身份說：「其實我第一次已經答咗，嬲嗰段時間好短，人誰無過呢，我冇事，我不嬲都話我冇事，當我第一次出嚟回應我已經話我冇事，我自己修復咗我自己個心，我係心胸肺科，我自己修復咗，大家唔使擔心！」
馬國明當然亦有備而來，對記者提問幾乎是有問必答。最初問到有否養貓，是不是有愛心的女仔會加分？他說：「我諗又唔係好關事。」之後記者單刀直入，問馬國明是否已回復單身？他說：「我冇乜講過啲乜嘢，總之我控制唔到報紙雜誌啲標題，但我成日都想講，我哋都仲有朋友，希望大家都畀個機會佢啦！我覺都鬧夠嘞，覺得大家反應過敏咗，始終係感情事啫。」
(apple daily)
