樂瞳今日出席活動分享患病心聲，席間表示自12歲經期開始，每個月都飽受經痛影響，簡直痛不欲生！
去年年中確診患上子宮內膜異位症（俗稱朱古力瘤）的她更自爆體內朱古力瘤有2.8cm大：「上年有朋友咁啱有咗BB，就同佢一齊去做婦科檢查發現，不過醫生就話可以唔使做手術住，依家係觀察期，定期隔幾個月番去覆診。」
樂瞳指能透過活動呼籲女性們去正視經痛問題，並有需要及早求醫是非常有意義：「唔好怕醜，婦女病殺人於無形，媽咪同婆婆都有經痛，都唔知關唔關遺傳事。（呢個病最嚴重係會導致不育，會擔心？）當然，老人家恨抱孫，我自己都想生，但唔會依家，雖然醫生話個瘤同BB可以共存，但自己唔想。」
講到最深刻的一次經痛，她說發生在去英國讀A-Level時期：「當時係借同學宿舍住，有日一齊出去買嘢食，有個男同學買完個漢堡包，我痛到嘔咗落佢個紙袋度，之後要兩個人一左一右扶我返去休息，仲搞到人哋成張床都係血，好尷尬！（當時有睇醫生？）冇，由細到大都係被灌輸一痛就食止痛藥，個個月都食，同埋盡忍。」
續指經痛都有影響拍攝：「拍《平安谷》嗰陣係頂硬上，痛到坐喺度標冷汗，仲有次拍廣告之前為咗靚啲，飲排毒果汁，搞到寒上加寒係咁嘔，要延期拍攝。」
離開TVB前拍攝最後作品《平安谷之詭谷傳說》，角色形象深入民心，成爲樂瞳的代表作之一。
(facebook / 綜合報道 / on.cc)
