藝人陳嘉寶（Anjaylia）產後復出，佢着上Deep V西裝出席活動，大騷Fit爆身材。
佢話囡囡日前已經滿月，並改名為「黃恩言」：「終於可以出關，其實我坐月坐得好曳，有陪月姐姐嘅時候，會約朋友出去食飯。」
Anjaylia又話公司已經為佢安排密密麻麻嘅工作，而佢亦好多謝屋企人幫手照顧BB，佢表示：「我覺得照顧BB係一件好神奇嘅事，睇住一個新生命孕育，感覺到媽媽嘅偉大，早午晚BB都會唔同樣。」
問到佢照顧BB時有冇狼狽嘅時候？佢笑言：「太多人湊，初頭BB細，我唔敢抱上身，都係畀老公抱，自己都好驚！依家慢慢都習慣咗，我覺得生命真係好勁！BB大得好快，我想盡量令佢開心健康、肥肥白白。依家都唔敢同佢沖涼，驚耳仔入水變成耳炎。」
佢透露當日生BB係自然分娩，痛咗足足廿幾個鐘：「好在唔使食全餐（指痛好耐先開刀生），當時我真係好驚要。」
講到佢今日以性感打扮示人，係咪因為做咗媽媽所以開放啲？她說：「冇關係，着衫要睇場合，不過做咗人媽媽係有自信咗、大膽咗，因為當日都對住醫生護士生BB，所有嘢都唔怕，依家吊威吔都唔驚。（會否再生？）個痛仲心有餘悸，遲啲先。」
講到好姊妹陳凱琳早前都生咗BB，問佢探咗BB未？她笑言：「我嗰陣都係偷走出去探佢，好開心大家都有共同嘅喜悅，大家都係傾幾時返出嚟做嘢。（送咗咩畀佢？）送咗有佢BB名嘅衫、被仔同埋用品。（BB似邊個？）父母兩人都有啲似，BB其實一日都有唔同樣。」
(on.cc)
