張慧儀15歲養子張晃維（Hanson）患有先天心臟病，由於問題越來越嚴重，去年10月在醫生建議下，接受以人工導管將上下腔靜脈連接至肺動脈的心臟手術，整個手術歷時近10小時。
手術後，Hanson做了三日三夜冷凍人，深層睡眠了整整三天，但醒後他一度有兩星期時間認不得慧儀，令身為媽咪的慧儀擔心不已，幸現時Hanson已康復過來。今個農曆新年，慧儀將與囝囝留港過年，及與囝囝加入兒童心臟基金會做義工。
《蘋果》今日致電慧儀，問囝囝手術後認不到她是否很心噏？慧儀說：「唔識講嗰種心情，好有陰影㗎我而家，嗰時心情好難過，我屋企人又唔喺呢邊，我又唔敢同佢哋講，嗰一刻我唔可以再接受啲負面訊息或者負面嘅情緒，我就自己撐住，嗰段時間真係好難過。」 醫生是否有說過手術後囝囝會不認得人？慧儀說：「醫生話一切言之過早，我哋再觀察啦，因為醫生呢句說話支撐住我，我都同自己講『言之過早』，一個大手術，落咗咁多藥，佢而家係康復緊，我哋唔可以好短時間去判斷佢，我不斷同自己打氣囉。」
究竟用甚麼方法令囝囝認得自己？慧儀說：「呢個係佢自己意志，我攞埋佢鍾意嘅玩具，包括埋ICU啲醫護人員唔好叫佢個名，叫佢幪面超人，因為佢鍾意幪面超人，成日講自己係幪面超人，我攞埋呢啲嘢同佢講，佢都唔係好知道。所以去到後期，我好感恩，我覺得係神蹟，個天憐憫我哋兩母子，同埋Hanson自己意志，逐漸康復，甚至康復到同手術前冇乜分別。」
慧儀表示囝囝手術後要戒口:「又驚佢燥熱喎，我間唔中燉啲肉汁畀佢，食啲有營養嘅嘢，食鱈魚，牛肉唔敢畀佢食，蝦蝦蟹蟹總之會發嘅嘢唔敢畀佢食，咁人多嘅地方我唔敢畀佢去，我好驚啲流感太犀利，佢始終手術完冇幾耐，我驚佢感染到啲乜嘢好麻煩。」至於手術費多少，慧儀表示不便透露：「好感恩，瑪麗醫院個開支都唔會好沉重。」
慧儀表示Hanson讀國際學校，因為做手術，去年7月已經停課沒有上學。不少家長都緊張子女學業，但對慧儀來說，囝囝健康才是最重要。她說：「冇錯，一個人瞓醒起身行路飲水係好自然嘅嘢，但呢個都唔係必然，所以Hanson喺醫院嗰段時間，唔係好清醒嗰段時間，我同自己講，所有嘢都係唔重要，一個人最重要係健康，所以我唔會要求佢點點點，讀書係重要，但我覺得人嘅品德係更加重要，佢一定要係一個誠實同謙卑嘅孩子，加上有愛心，就算佢讀書唔係好叻、好平庸，我相信佢出到嚟社會，大家都會願意幫助佢、接受佢。」不過，為了囝囝將來，慧儀表示自己未來都要繼續努力賺錢。
（appledaily）
