林峯最近真係人逢喜事精神爽，同27歲內地女模張馨月感情穩定，早前被影到拍拖行玩具店。
仲一齊出席三嫂生日party！
不過，林峯都唔係重色輕友嗰種人，噚日又約埋13期訓練班一班老友聚舊，林峯仲大手筆送出每人一個金牌，真係要多謝「峯哥」！
李忠希今日喺IG貼上大合照，楊怡、徐榮、張美妮、趙永洪等都有出席，李忠希話﹕「13期訓練班20周年紀念金牌，多謝林峯，開心的聚會，感恩情不變。」林峯話晒都係「廈門李嘉誠」林華國個仔，有指林爸爸坐擁20億地產王國，所以送金牌呢啲少事，對峯哥嚟講都係「濕濕碎」。
一貫慣例，如果喺大台做足20年就會送金牌，但唔少人都已經離開TVB，所以林峯好有心思，特別訂製一個印有13期訓練班同學嘅大合照金牌，好值得珍藏同紀念。
懷有5個月嘅張美妮今日接受傳媒訪問時話﹕「阿峯好好呀，今年識咗20年，佢整咗金牌送畀我哋每一個，超好！因為我哋當中，只有我、徐榮同楊明係連續接到公司嘅20年金牌，但其餘個個都冇，上次聚會，阿峯就話不如自己做一個金牌送畀大家，去紀念呢個20年嘅friendship。」
問到幾耐聚舊一次？美妮話﹕「冇特定，邊個得閒，又好耐冇見就見一次。但都有啲原因嘅，好似上次係我哋剛踏入20年，今次阿峯好好，金牌做起咗，所以又約食飯聚吓舊。另外，都開心嘅，就係我有咗BB，有咗之後第一次見真人，個個都恭喜我，好開心。」美妮仲透露佢哋會講好多讀訓練班時嘅趣事，佢話﹕「由訓練班讀書開始，之後喺公司開工，講吓新嘢，又repeat講以前好多趣事，細路仔細路女乜都玩，所以每次見面都好開心。」
(apple daily)
