無綫處境劇《愛．回家之開心速遞》播足兩年，收視持續上升，甚至跑贏好多黃金檔期劇集，齋睇1月1日嗰集收視突破30點，就知呢套劇有幾受歡迎，當中唔少參與嘅演員因為咁爆紅，好似「博士」馬貫東同「Mandy」謝芷倫就係其中之一，呢對情侶檔大受網民歡迎！
不過大家都唔會再見到呢對人喺《愛回家》出現，因為佢哋宣布要離開劇組一段長時間。唔少網民得知呢個消息都話晴天霹靂嗌接受唔到！
其實睇番之前嘅劇情鋪排都有迹可尋，之前講到Mandy幫大小姐頂罪喺「橙不忍島」坐監，加埋上年9月一個宣傳活動，布景板竟然冇咗算得上重戲份嘅Mandy個名，就已經有網民推斷佢要消失。
琴晚劇情講到Mandy放監就去咗英國讀法律，博士決定赴英陪佢就向「熊樹根」劉丹辭職，就係咁呢對正式消失。
謝芷倫喺社交網留言多謝網民一直以來嘅支持話：「我會盡快學成歸來！我衷心多謝你們每一位的支持。❤」
之前《愛．回家之開心速遞》宣傳活動上已經無名無樣，加埋劇情講到Mandy坐監，當時唔少人已經估到佢將會離開劇組，大叫不捨！
而「秦博思」馬貫東亦有留言：「《愛回家》帶給我許多許多，除了寶貴的演藝經驗，還認識到一班好有愛的『家人』。台前每一位前輩、演員和幕後每一位工作人員的教導、包容、支持和鼓勵令我獲益匪淺，十分感恩。每天努力學習，每天進一小步。今天短暫離開，願在不久的將來會呈現一個更好的馬貫東回來這個家。」
好多網民留言話唔拾得之餘，都話唔明編劇點解要寫佢哋消失嘅劇情咁趕，放監都可以結埋婚先至去讀書，會好過依家咁安排，網民仲話希望真係好似佢哋所講，會好快再見佢哋喺《愛回家》出現。
(綜合報道 / on.cc)
