新一年劉心悠已經計劃多多，不外乎以電影同電視劇拍攝為主，而心悠每年都會定下一個目標，不過目標喺一個月內已經達成，心悠笑言：「自己每年都set目標，舊年跳咗芭蕾舞，我真係好自豪，至於2019年，因為長期傾劇本好多時都因為要識游水，機會畀咗第二個人，當然都有其他因素，我好想克服，幾日前已經克服咗，可能set得太低，所以我會挑戰下一步，啱啱識咗蛙式，可以游到50米，希望學埋自由式同難度啲，搵咗私人教練，以前踩唔到水就失控，一定會沉，我好感恩自己好勇敢面對自己嘅恐懼。」
心悠坦言家人比愛情更滋潤，佢仲希望將時間表分配工作以外，可以撥一部份為旅遊，心悠話：「屋企人嘅滋潤多啲，我覺得自己係比較理性嘅女仔，唔需要依靠男人，男人好需要女人依靠，或者我未遇到！我嘅要求係起碼要鍾意動物，最好識游水，我游水（遇溺）佢可以拉我一把，又唔使游水教練咁叻，如果成日叫我應該點游點游，我會好驚。」
雖然現時感情空白，問到心悠會點樣教育未來嘅小朋友？佢話：「我冇諗過，因為呢個係好大嘅責任，有時會諗領養會係一個選擇，領養責任係一世，諗起係一個恐怖嘅責任。」問到佢係咪寧願領養多過自己生？心悠就話：「我考慮過㗎，我屋企唔會抗拒一個咁嘅諗法。」
愛心滿瀉嘅心悠最近做咗「媽媽」，早前去咗非洲探訪，同時收養咗兩名當地嘅孤兒，心悠自覺生於幸福國度，現時城市嘅小朋友生活富裕，佢亦呼籲大家唔好浪費資源，應多關心別人嘅需要。
另外，早前心悠由國際培幼會安排下到非洲探訪，去過當地嘅難民營同家訪，感受甚深，心悠話：「今次旅途好遙遠，去咗非洲難民營同當地一個家庭，睇到佢哋所遇到嘅問題，了解草根性嘅問題，了解佢哋缺乏啲乜？點可以着手幫手？我自己好享受今次經歷。探訪完會覺得自己係好幸福，人為咗生存係會做好多嘢，其中一個個案係5姊妹係孤兒，當中10幾歲嘅大女，為照顧4個妹妹，每日頭頂20個磚頭，搬15轉，每日得2.6港幣，睇佢覺得好慘，但係佢為咗生存，我覺得佢係英雄！咁細個有咁多重擔喺身上，所以知識、求生能力好重要，我發覺最緊要係照顧佢哋嘅生活，所以固定一筆錢供佢哋返學、買營養食物，呢啲先可以全面照顧到佢哋嘅問題。」
(apple daily)
