近排見到好多藝人喺社交網拎住一款Mask大力推介，原來呢款獲熱捧嘅係「MYRTUS 8」面膜（又稱「M8皮秒面膜」、「女神8號面膜」），不過有樣本近日被政府化驗所驗出，含有未標示嘅類固醇「氟輕鬆」。
佢係一種需要醫生處方，兼由註冊藥劑師監督下，先可以買嘅第1部毒藥，如果使用不當或過量，可引致皮膚問題，甚至全身都有副作用，倒如圓臉、高血壓、高血糖、肌肉萎縮、腎上腺皮質功能不全、骨質疏鬆等。衞生署呼籲市民停買兼停用。
呢隻面膜上個月至喺facebook整咗個香港專頁，獲莊思敏、羅霖、張學潤（Nel Nel）、楊怡、唐文龍、陸詩韻、林文龍、曹永廉、吳家樂、湯寶如、陳松伶等藝人推介。
該品牌的facebook專頁聲稱此面膜非常搶手，「10個客，10個都回頭再買！所以啱啱返咗批貨，又俾人搶鬼晒……大部分客都反映，用完之後第二朝無晒毛孔、皮膚瑕疵唔見咗一大半、仲勁有光澤」。
不過歌手陳柏宇的妻子符曉薇，昨日（14日）在Instagram直播時透露，她最初使用該面膜時，曾以為肌膚變得白裏透紅，但原來是敏感症狀，當時更嚴重至連化妝也遮蓋不了。老公陳柏宇聞言，更在直播插嘴道：「你（符曉薇）話你白裏透紅嗰陣，我已經話你敏感，唔好咁白痴啦，你第二日都堅持要敷。」
面膜facebook專頁的廣告帖文，提及產品含多種成份，如分子釘、天然強陰電性柔潤因子等，聲稱可助皮膚「底層膠原細胞再生……個個用完都返唔到轉頭」，卻未有提及政府化驗所驗出的類固醇「氟輕鬆」。即使該面膜近日開始被人質疑成份有問題，專頁僅稱產品已通過由本港合資格檢測中心所做的多種「常用」類固醇和激素含量測試，符合「中國化妝品」的衞生要求。
藝人莊思敏電話回覆傳媒時話：「我之前用咗一段時間，我有推介過，覺得幾好用，身邊好多朋友都有用，我一路用都冇問題，有睇過佢哋一啲嘅驗證，我本身易皮膚敏感，好多嘢用唔到，停咗用近一個月都冇問題，我有了解廠商嗰邊，佢哋懷疑有冒牌貨流出市面，佢哋都話有驗過自己啲貨都係冇問題，唔知中間發生乜事，唔知係咪有啲假貨流出咗市面，而嗰啲假貨係咪有問題。」
衞生署昨指，跟進市民查詢後，發現銅鑼灣有2間零售店，售賣上述產品。署方從2店取得產品樣本，交予政府化驗所化驗，檢驗結果顯示，樣本含有《藥劑業及毒藥條例》所列的第1部毒藥──類固醇「氟輕鬆」。含「氟輕鬆」的產品，只可獲醫生處方後，在註冊藥劑師監督的藥房，才能購入。不當或過量使用類固醇，會引致皮膚問題及全身性副作用，如圓臉、高血壓、高血糖、肌肉萎縮、腎上腺皮質功能不全及骨質疏鬆等。任何人非法售賣或管有第1部毒藥，一經定罪，每項罪行最高罰款100,000元及監禁2年。
面膜商今午在facebook回應，稱「不排除市面有假貨流通」，呼籲顧客先停用，而「作為負責任的商家」，稍後會安排全面回收，詳情會通知零售商，重申公司在推售面膜前，已找本港合資格檢測中心，反覆抽驗面膜中「可驗」的類固醇和激素，「盡我們所能地保障消費者」。
沒有代售該面膜的美容及健康產品店創辦人袁彌明在facebook透露，早前她查看該面膜的成份表時，發覺「根本無特別，仲有唔少有害化學劑」，直言自己「試都費事」。她又批評，雖然這款賣到成行成市的面膜，「極多明星endorse（推薦）」，但他們根本不知道「自己endorse緊啲乜……原來（面膜商）加咗類固醇。真係去到黐線，想害死人咩？」
(appledaily)
