熊黛林（Lynn）今日喺鴨脷洲為經理人周優根（Kim）同時裝店太子爺陳栢熹嘅古着店開幕擔任嘉賓，Lynn話時裝再續係好事：「我哋最多cocktail dress，着咗一次就唔會再着，都希望有鍾意佢哋嘅人可以買返去。」
講到兩個囡囡Kaylor同Lyvia，Lynn話佢哋已經9個月大，熊媽媽開始教兩個孫女講嘢：「o依家屋企好嘈，不過真係好開心。」
至於會唔會再追孖仔？Lynn即拒絕話：「唔得、唔得、唔得，真係攞命！上星期佢哋第一次病，雖然有媽咪幫手，但都瞓得唔安樂，好攰。老公有時都會起身幫手，不過佢冇我咁熟手，第二日又要返工。」不過佢透露老公都想再生小朋友，Lynn表示隨緣，但暫時真係好驚。
問到郭富城宣佈太太再有喜，Lynn話會恭喜對方，但追問會唔會將孖女嘅衫轉贈畀對方嗰陣，Lynn話：「你哋唔好再問我啦，有啲為難我。」
(apple daily)
