藝人譚凱琪（Zoie）憑劇集《大帥哥》中飾演「天嬌」一角而大獲網民好評。
《大帥哥》噚晚播大結局，戴住「天嬌」光環嘅Zoie仍持續人氣高企。
相關新聞：
【網民感動到喊 大帥哥張衞健：唔要權唔要勢唔要錢只要⋯】https://goo.gl/7Amwu1
【《大帥哥》大結局 洪永城親筆寫信畀張衞健：大哥，你成功了！】https://goo.gl/W1JEKv
其實Zoie入咗行已經18年，19歲以小室哲哉徒弟之名出道，但向來都係演花瓶角色，年前喺《EU超時超任務》色誘戴耀明令對方動L，被網友戲稱做「動L女神」。
但天嬌令大家知道，原來譚凱琪都識演戲，向大帥哥真情表白一幕，喊到七情上面，睇到人好心酸。
譚凱琪雖然已經37歲，但樣貌、身材仍然keep得好好，除咗有童顏，仲有童心，日前佢出席完《大帥哥》活動後，約埋兩位十幾歲學生妹一齊去中環嘉年華玩。
當晚約七點半，Zoie打扮sharp醒，短褲襯長boots，唔少途人都認得佢係「天嬌」要求合照，Zoie表現大方來者不拒。
見Zoie對機動遊戲興趣不大，兩位學生妹上去玩，Zoie就喺下面幫手影相。之後佢哋去咗附近玩攤位遊戲，玩完拋圈入玻璃樽，再玩掟波波，見佢哋有商有量，好似好有策略，玩咗十幾分鐘，終於贏到一個公仔，叫做有斬鑊，大家都表現得好興奮。玩到八點幾，佢哋就由VIP通道離開。
Zoie噚日接受傳媒訪問時透露其中一位學生妹係佢姨甥女。有報道指Zoie有意係今年與拍拖5年嘅富二代男友莊日宇(Enrico)結婚，據聞男方係集團餐廳老闆，曾將旗下一間美式餐廳交由Zoie管理，年前男友更大手筆買下九龍塘一個千萬單位，與Zoie共賦同居。
Zoie笑話﹕「做豬年新娘都唔錯，但之前我哋真係冇乜plan過結婚，嚟緊我都仲有幾套劇拍，好忙，遲少少先再算。」問到男友有冇詐型？佢話﹕「冇，大家一向都尊重大家嘅工作。」
(綜合報道/apple daily)
