鄭秀文（Sammi）最近同老公許志安短暫分開，因為安仔去咗滑雪，而Sammi就留咗喺香港。不過Sammi一啲都唔寂寞，噚晚出席活動時，仲話一向好享受單獨一個人，有時又會約吓朋友食飯。
果然，Sammi噚晚真係約咗人食飯喎，仲係一個男人！佢係邊個？就係同Sammi喺電影工作，合作無間嘅大導演杜琪峯囉！Sammi一向愛上喺社交網分享日常生活大小事，今日凌晨喺Ig貼咗條短片，佢同杜sir排排坐喺鏡頭前，杜sir仲搭住佢膊頭，然後Sammi就問杜sir今日咩事請食飯，點知杜sir就話：「冇嘢！」
之後Sammi同杜sir介紹Ig嘅拍片功能：「好短咋，得一分鐘咋，你唔好發咁多言呀！」搞到明顯好少玩Ig嘅杜sir，十分好奇，佢反問Sammi話：「咩一分鐘，咁做乜要講啫，你做乜唔講耶穌？你唔講你愛上帝，你要講喎，如果得一分鐘，你要話畀人聽你愛仁慈嘅上帝喎！」
杜sir忽然講唔停，Sammi惟有笑住咁答佢：「我愛呀！但我講得太多，唔能夠逼，信仰呢樣有自由嘛！」點知杜sir繼續打爛沙盆問到篤，再問：「咁點解要一分鐘呀?」
全程妙問妙答，Sammi都招架唔住：「冇呀！拍啲片上載吓之嘛！」有網民笑言杜sir係唔係飲醉咗。
而Sammi除咗拍片，仲喺IG留下長長感言，佢話：「Mi最敬重的人。早已遠遠超乎工作合作關係。他是我的良師，伯樂。每次見面總有聊不完的話題。他現在這個人生階段最希望就是能夠藉着『鮮浪潮』提攜一些新進的電影工作者。他這個人對於後輩的提攜從沒帶着一點私心，完全出自真心真意，因為他愛電影，很樂於提攜後輩，他樂於看見青出於藍勝於藍。每次聚在一起，我們都會聊天，甚麼都聊，好開心好寬心。他明白Mi、Mi也明白他。對於我來說，藉着拍戲認識了這個人和他太太杜太，Mi覺得非常無價。這十八年來沒有令我們的感情減少，反而是遞增反而是更深厚，謝謝杜sir對我的提攜和愛，每次看到他，就猶如看到父親一樣，總之，他活得開心，我就安心。」
(Apple daily)
