成龍去年底推出英文版自傳，因為書中隻字不提私生女卓林，遭受非議，但成龍一於避提，實行大家有大家講，佢有佢唔答。
台灣《蘋果日報》日前收到風成龍喺台北西華飯店出沒，到場果然見到成龍身影！當日成龍上咗接載佢嘅車往東區，其後消失車群中。兩日後、即係噚日，成龍再度現身西華飯店，當佢上車離開時，記者上前同佢講「新年快樂」，佢亦都有轉身回應「新年快樂」。
當記者追問佢有冇聽過個阿仔房祖名同女星歐陽娜娜一齊嘅新聞，成龍聞言快速上車坐低，唔知係咪聽唔清楚問題，佢先係「吓」一聲，之後反問：「誰？」
當記者重複提到祖名個名，成龍竟然爆出一句：「誰是房祖名？」其後成龍座駕直駛松山機場，架車尚未停定就急急落車閃人。
媒體就笑言成龍繼唔認卓林之後，輪到房祖名，亦有網留言稱：「龍二代，都哭了。」
其實祖名同歐陽娜娜嘅緋聞喺前年傳出，年紀相差18年嘅兩人被指見晒家長，加上成龍過往曾被問到個仔呢單緋聞時讚過歐陽娜娜，仲話「如果是真的也不錯」，而歐陽娜娜亦喺電影《機器之血》中同成龍合演過。
歐陽娜娜來頭唔少，佢喺台灣前演員、現任國民黨發言人歐陽龍同女星傳娟嘅女，佢本身仲係一名大提琴家，12歲就登上台灣國家音樂廳，成為該場館有史以來最年輕嘅演奏家。
(apple daily)
