上次仲未好明顯，今次終於見到凸肚啦！
陳凱琳（Grace）、林慧韡（達哥）及杜小喬今日去到旺角街頭出席食肆宣傳活動。懷有身孕嘅陳凱琳身材明顯升級，Grace話升咗幾多就唔知，不過屬於正常，Grace說：「自己每日望住個肚大，覺得好神奇，估唔到身體慢慢轉變，感覺良好，食嘢方面自己食多餐，但量唔多，有時夜晚12點、1點都要食嘢，自己鍾意食湯麵，嘉穎話會煲湯畀我飲，但我仲等緊佢煲湯。」
問Grace夜晚有冇要求嘉穎買消夜俾佢食，Grace話未試過，佢話通常嘉穎朝早準備好晒。Grace話懷孕之後，食嘢口味改變，以前鍾意食西餐，o依家鍾意食鹹嘢同中餐，同埋想食炸嘢，Grace話嘉穎o依家對自己都特別溫柔：「今日出門口之前，都同BB講話小心啲睇住媽咪。」
嘉穎係呢間食肆嘅代言人，今次搵咗Grace接捧宣傳，Grace說：「嘉穎今日出門口之前，都叫我同高層朋友打招呼。」問佢哋會唔會夫妻檔，Grace話：「唔知，最好啦！難得可以一齊拍廣告。」
對於會否一家三口拍廣告， Grace笑言：「BB未咁早食得炸雞。」Grace話暫時未接過母嬰產品廣告，一切順其自然，佢話o依家好易攰，好眼瞓，經常要休息，短期內唔會拍劇，因為唔想連累劇組進度。Grace透露佢同嘉穎已經諗咗幾個BB英文名，而中文名留番畀父母改，相信到時出世就會有頭緒。
(apple daily)
