正當大家都以為佢係鑽石王老五時，網上忽然傳出佢爸爸踢爆阿仔就嚟結婚！
有傳結婚對象係佢。。。
身家逾2.5億港元，出道17年嚟感情保持低調，佢曾經講過35歲想結婚，後嚟又改口，稱以事業為重，40歲先諗結婚，佢都戴定頭盔，話如果「碰到對的人是另外一回事」，呢位「對的人」似乎出現咗，今日被爆要結婚喇，「爆料者」仲係佢爸爸！？
現年38歲台灣歌手潘瑋柏，依家主力大陸發展，上年佢就做咗內地HipHop真人騷《中國新說唱》製作人導師，人氣勁又單身寡仔，自然成為圈中搶手貨。
據內地傳媒報道，本身係台灣實踐大學做教授嘅潘爸爸，上堂講講吓書，就提到仔仔潘瑋柏，講到興起仲唔覺意向同學們爆料潘瑋柏即將結婚，有網友就將呢件事「宣揚」開去，呢位網友仲晒埋潘爸爸講緊書個樣。
跟手就傳出潘瑋柏嘅結婚對象係曾傳過緋聞嘅上海空姐Luna Xuan。
又搵嚟二人多張情侶同款洩蜜照，咩鈔票槍、同款紅色行李箱等等都畀網友摷晒出嚟，仲傳話二人已同居添！
Luna Xuan曾被中國網媒稱其為「最美麗空姐」。
有大陸報道向潘瑋柏身邊嘅工作人員求證，對方否認呢個消息，稱潘爸愛開玩笑。剛才「潘瑋柏工作室」微博澄清：「Boss說謝謝大家這麼關心他的大事，但目前未婚，也還沒有人願意嫁給他，哈哈，但已收到大家關注，會繼續努力。」
其實潘瑋柏同Luna早前被爆於台北市大直豪宅同居，Luna更刪走自己嘅IG，潘瑋柏所屬公司當時只稱「對於藝人私事不予回應」，未有否認戀情；據知潘瑋柏近年主力喺大陸發展，經上海嘅朋友介紹下認識Luna，有傳潘瑋柏喺上海工作嗰陣，Luna都有去探班。
(綜合報道/on.cc)
