42歲陳少霞同前夫生咗2個女之後離婚收場，之後好幸運地畀佢再搵到幸福，喺前年同61歲「法拉利之父」李文輝結婚。
原來陳少霞結婚後一直想為老公生個BB，今日有報道就話陳少霞去年原來曾經小產，因為呢件事，陳少霞大受打擊，有3個月時間同外界完全隔絕，後來佢接受醫生建議接受人工受孕，可惜唔成功，陳少霞唯有打消生BB嘅念頭，點知竟然自然懷孕，令陳少霞同老公都相當開心。
相關新聞：【兩年前嫁61歲八億身家富商 42歲陳少霞佗第三胎恭喜哂！】https://goo.gl/ZFufAE
出席活動時已經見到肚凸凸。
《蘋果》今日打畀陳少霞求證懷孕一事，佢先透過短訊話:「感謝主，感謝大家的祝福！這次懷孕不是預期之內的，我對懷孕沒有太大信心了，但我在9月23日受浸後，10月我就懷孕了！所以真是神給我們最好的祝福！再一次感謝大家對我們的關心，願主賜福給你們。」之後佢再話:「我同Richard都好感謝你哋咁關心我哋，係呀，好開心，咁樣嘅age，我哋都冇諗過可以自然有BB㗎，所以真係好感謝主。依家精神好咗好多嘞。懷孕初期成日反胃作嘔，好怕煙酒及油煙味，所以好耐冇入廚房，每日以白飯及烚粟米醫肚，所以瘦咗，但去睇醫生佢哋話係正常嘅，冇反應先唔好。好記得第一次去照超聲波，護士話我係咪有高血壓，因為血壓偏高，好彩照完話胎兒好健康、一切好好，咁我個心定咗再度血壓，血壓真係正常番冇事，護士叫唔使咁緊張。」
至於預產期正值少霞夫婦結婚紀念日前後，令她額外好開心，她說：「有咗就成年咩嘢禮物都唔使送畀老公嘞，可以慳番，呢樣係佢最好嘅禮物囉。我哋都好感謝外界朋友嘅支持，有啲朋友仲開心過我，亦都多謝媒體嘅關心，祝大家新年進步。」
(綜合報道)
