一連20場的劉德華「My Love Andy Lau劉德華World Tour」，月初舉行，相隔八年再踏紅館舉行跨年演唱會，相信好多fans都好期待。
不過華仔唱到第14場，甫開場唱歌已明顯聲沙沙，唱至第三首歌時已開始走音，及至吊在半空唱第四首歌時，突然停下來，對觀眾說：「我真係唱唔到，唔好意思，對唔住！」之後喊着說：「醫生建議我唔好唱……要停止喇！」要腰斬個唱，而且華仔仲失望到喊，唔好話華仔，相信所有人睇到都心痛。華仔在紅館內無奈宣佈消息後，向歌迷鞠躬，再轉身返回後台，據消息指華仔已離開。
相關新聞：【舒淇楊千嬅等藝人齊集氣 劉德華演唱會最新消息】https://goo.gl/89ipdp
昨晚一眾藝人如任達華夫婦、舒淇、胡杏兒都有去華仔捧場，可惜華仔喺台上唱咗3、4首歌後，就同觀眾講：「真係唱唔到，唔好意思！」之後，華仔又表示自己喉嚨痛，醫生亦有叫佢唔好唱，華仔就開始喊，坐在觀眾席的妻子朱麗倩也忍不住落涙，而舒淇亦有喊。至於昨晚有去睇爸爸演唱會嘅華仔囡囡劉向蕙，就先行離開觀眾席，在場fans雖然失望，但就好支持華仔呢個決定，而睇見華仔喊，都大叫「華仔唔好喊！」
劉德華在演唱會途中，向觀眾說：「醫生建議我唔好唱，但我真係唔捨得。我唔想大家聽我呢把聲聽成個concert，但我冇辦法，所以我唱埋呢隻歌（《如果有一天》），要停止喇！善後嘅工作我會慢慢交代返，希望我盡最大努力唱完呢隻歌，亦都希望你哋陪我一齊唱。要同大家道歉，多謝你哋，你哋要畀多次掌聲你哋自己！」然後唱最後一句：「你心我心，手與手 連成一線，為你可分憂，好朋友。」然後在台上雙手合十，分別向四邊觀眾鞠躬。
昨晚有去聽演唱會的Jeana何佩瑜：「開頭氣氛好好，唱咗幾首歌，真係聽得出佢把聲好沙，希望佢好番，快養番好把靚聲。最後宣佈腰斬時，佢都喊，好多人戥佢心痛，我媽咪都喊，我媽咪同細佬都係第一次睇演唱會。」昨晚亦有去睇演唱會的胡杏兒回覆《蘋果》時，佢話：「希望佢快啲快啲好番。」任達華夫婦同樣有入場睇華仔演出，琦琦晚上於微博表示：「今天看到了一個偶像，一個真正的榜樣，佩服他的敬業態度，加油Andy.祝你快速康復，最棒的偶像」
Sammi在IG話原本約好隔日去睇演唱會，但知多年拍檔要腰斬個唱，為對方打氣：「大家都明白你已經盡全力，把最好的演出呈現，聲帶出現問題是不能預計的。Mi非常明白在演唱會『失聲』的感受。今天下午還跟你互text message，約好明晚來看你演唱會…不過，我想華仔知道，mi跟所有觀眾一様，你的身體健康最重要，無論你有甚麼決定，大家都支持你。」
蔡瀚億在IG感謝華仔堅持演出：「由自己親口說出將演出腰斬的勇氣以及那種痛，只有表演者才會體會到。雖然我只看了短短一小時也不夠的演出，但令到我對你的敬重再一步昇華，祝你早日康復，再次燃燒整個舞台！多謝你今晚堅持的演出，多謝你的《如果有一天》。」
(綜合報道/apple daily)
