台灣女星賈靜雯上個月喺峇里同老公修杰楷補辦婚禮（相關新聞：https://goo.gl/zBf2G5）。
雖然台灣冇放聖誕假嘅習慣，但係過聖誕係大部份小朋友最期待嘅節日之一，所以賈靜雯都有應節，同佢幾個寶貝女慶祝。
因為大陸真人騷節目而為人認識嘅「咘咘」同「波妞」，跟父母及同母異父嘅大家姐「悟桐妹」一齊影全家福。
今日賈靜雯貼相上Instagram，佢留言話：「幾天前就開始享受聖誕氣氛啦，今晚還要繼續，聖誕老公公真的好好用，只要兩個小搗蛋（指咘咘及波妞）調皮時，我們跟大姐姐都會同時說：『吼……這樣聖誕老公公可能不會送禮物來囉！因為老公公喜歡好好說話笑咪咪的孩子！』此話一出，立刻不吵鬧。」賈靜雯仲笑問：「聖誕老公公可以每天都來嗎？」
睇嚟佢係想借聖誕老人嘅力量，令到3歲嘅咘咘同1歲半大嘅波妞乖乖聽話。
從相中見到兩個細嘅影相時無厘正經，而且細女波妞經常皺眉，難怪連媽咪賈靜雯都要hashtag落話「波妞真的愛皺眉」，但佢個樣仲係相當得意。
至於悟桐妹應該係返咗台灣跟媽咪過節，佢今日亦都有喺IG貼相，佢透露自己收到一條頸鏈、好多自己鍾意嘅書，同皮外套，佢明言「收穫滿滿」。
睇番佢啲相，佢將自己同繼父修杰楷張大頭合照放喺第一張，之後先到媽咪賈靜雯，再到兩個妹，睇嚟佢同繼父嘅關係真係好friend喎！
(apple daily)
