佢哋前日(23日)喺赤柱一間餐廳註冊結婚，雙方家人、黃玉郎、鄭丹瑞、盧冠廷等都有見證佢哋開心時刻。新郎着西裝襯牛仔褲打煲呔，新娘就着白色套裝，兩個人打扮好causal。
拍拖以來一直保密，連父母家人都不知情，直至今年四月喺Facebook宣佈拍拖兼訂婚，終於開花結果！
現年77歲、曾為《天才與白痴》同《半斤八両》等經典電影繪畫海報嘅「電影海報教父」阮大勇，今年4月爆出同細佢31年嘅酒店公關(市場及傳訊總監)許慧韶（Virginia）發展忘年戀，兩個人喺社交網宣佈拍拖消息之餘，仲宣佈埋訂婚消息（相關新聞：https://goo.gl/zSSwsF）。
今年4月阮老師同Virginia細訴兩人相戀經過。阮老師於2007年經歷喪偶之痛，與前妻育有一仔一女，阮老師前年同Virginia認識，Virginia話阮老師同自己爸爸同年紀，所以特別好傾，但後來發現阮老師有追求之意，曾經好抗拒，但愛Virginia愛得好深嘅阮老師，用誠意打動女方，主動教Virginia畫畫，又不停喺社交網讚好Virginia嘅post，終於成功打動Virginia芳心，喺今年1月正式交往。
阮老師好開心咁話：「喺赤柱一間餐廳，黃玉郎、鄭丹瑞、盧冠廷兩夫婦，仲有祁文傑、邱福龍，都好多好朋友嘅。」
講到婚禮好低調，阮老師就話:「我覺得低調啲好啲。雙方證婚人簽名，不過因為我爸爸媽媽都過咗身，所以我請咗黃玉郎先生幫我做證婚人，好開心。大家食西餐，影相食飯，下午兩、三點就結束，好開心，雖然有毛毛雨，但好似氣氛更加好咁。」
再做新郎心情點樣？阮老師話：「好開心，雖然係咁嘅年紀，第二次，但我覺得簽咗婚約之後係開心嘅，感覺係完全唔同，真實咗，夢想成真。」對太太有乜承諾？阮老師話:「對佢更加好，更加愛佢。」阮老師話太太今日都要返工，因為聖誕節酒店工作好忙。
至於Virginia接受訪問時，就話婚禮好簡約好開心:「好多朋友支持我哋，所以我哋覺得好幸福好幸福。好難得個天都安排得好好，雖然有微微落雨，但當我哋一註冊完，個天就即刻光晒，好似喻意一天光晒，我哋兩個都好感動。」
恭喜哂！
(apple daily)
