藝人陳凱琳（Grace）、劉穎鏇、孫慧雪昨晚到屯門出席「V City甜蜜倒數迎聖誕」活動，三人輪流獻唱及孖fans玩遊戲，更獲送上禮物，而送給Grace的禮物是老公鄭嘉穎與她的合成BB照，非常溫馨。
Grace啱啱宣佈佗小嘉穎(相關新聞：https://goo.gl/3rrfsM)。
佢喺活動上神采飛揚，好高興咁同fans影合照，活動上三人又互送聖誕禮物，劉穎鏇就話要好多小朋友物品俾Grace。
大會又要求三人做瑜伽pose，結果雪雪最柔軟，而大肚婆Grace只係舉高手。
Grace受訪時相當開心，佢話帶着「Baby Kelvin」出活動：「終於可以同大家講，收到好多人祝福，今年兩個人過，暗地裏有第三個，諗到出年好唔同就好溫暖。嘉穎今日喺美國登台完返嚟，今晚返到香港，自己出嚟做嘢未見到佢。」
問到開始買BB嘢未，Grace就話：「未買，想揀啱先，都要忍手，驚成屋都係，始終市面選擇太多。（嘉穎買嘢狠過你？）係呀！佢成日叫我行街睇BB嘢，以前都唔係咁。（你會唔會呷醋？）好在係仔，如果女嘅話，我地位可能降級，反而係嘉穎叫我唔好掛住個仔、唔記得老公。」
而聖誕節就會同雙方家長食飯慶祝。
之前有報道指兩人為咗小朋友，已經搬咗去天后豪宅，方便兩父子喺同一間學校讀書做「師兄弟」，Grace否認：「吓，唔係喎，冇搬屋。」問到會否搬屋遷就校網？她說：「冇咁快，我唔識，一步一步嚟，我屋企都夠空間。」
咁Grace媽媽是否搬去同住方便照顧佢？Grace作出否認，表示媽媽只是嚟煮嘢食。
Grace又表示每月最期待照超聲波看BB樣子，講到產檢就露出燦爛笑容！
對於之前嘉穎誤會臍帶是「何B仔」，問BB是否很「大條」？Grace避而不答，並笑說：「佢依家知道咗，唔會再犯呢個錯。」
同場仲有孫慧雪，已有一個囝囝嘅阿雪，獲大會送咗一張孕照，預祝佢來年再有喜，生番個B女，湊夠個「好」字！
問到佢係咪都想再做媽咪，佢話︰「冇呀！明年嘅工作都排得好密，暫時唔會住，老公都批准，因為知道我忙於工作，過多兩年先，o依家湊囝囝都覺得好攰，會專心拍劇先。」
問到點解老公唔畀佢做少奶奶？阿雪話︰「老公鍾意我勤力，初時以為係讚美，到o依家終於都明白。」至於陳凱琳有冇同佢取經學湊仔，「都有，Grace問我有冇做孕婦瑜伽，初時都日日上堂，後來因為BB頭圍太大，自然分娩唔到，結果都係開刀，嘥咗之前學孕婦瑜伽。」
(綜合報道)
