37歲鍾欣潼（阿嬌）前日跟台灣「醫界王陽明」賴弘國（Michael）在尖沙嘴註冊，榮升賴太嘅阿嬌同老公休息一天後，今晚一對新人假西九一間酒店擺喜酒，現場一遍花海好浪漫，蔡卓妍、容祖兒和鄭希怡為阿嬌擔任姊妹團，「龍虎豹蛇」分享喜悅。
大家最關心嘅問題都係幾時生BB？阿嬌聽到，就轉身用國語問Michael：「你能幫我懷孕嗎？」Michael即答：「我都想。」阿嬌再跟記者話：「順其自然啦。」Michael話太太有100分，仲用廣東話讚太太「幾靚」，不過阿嬌唔收貨：「吓，幾靚？」記者即刻提水，係「好靚」，Michael先話「好靚女」又解釋番仲學緊廣東話，所以講得唔係幾好。
「賴太」阿嬌孖老公拖手現身見傳媒，應記者要求錫咗3次，阿嬌不時深情望老公，阿嬌着deep V拖尾長裙晒事業線，襯鑽石耳環同鑽石手鈪，性感迷人，兩夫婦齊騷婚戒，賴弘國十分細心，見到阿嬌前面地下有垃圾，即主動執走，等老婆可以十全十美影靚相，兩人化身甜蜜接吻魚，應記者要求連啜3次，阿嬌不時深情望着老公，幸福滿瀉！
問到新郎送乜嘢禮物畀老婆？佢用國語表示：「有一個小節目。」阿嬌望着老公笑問：「吓？」問準備了多久？Michael坦言：「不是太久，有空就練，幾個星期，自己也很緊張。」醒目嘅阿嬌笑問老公：「幾個星期，即係唱歌啦？」Michael要保持神秘給老婆驚喜，笑笑口說：「不透露，我不會別的東西。」暗示係唱歌。
而問到阿嬌心情係咪好緊張？會唔會想喊？阿嬌話：「今日好開心，好多朋友推晒工作由第二度飛嚟，因為佢哋嚟見證我哋大日子。」問到之前減磅係咪為咗今晚呢條閃爆deep V裙？佢話：「我仲有幾套呀，前排真係腫啲。」佢仲話好彩今晚冇搞主題，講到兄弟團表現好chok，問到係咪幫姊妹團謀福利？Michael表示：「他們是我小時候的朋友。」對於蔡卓妍笑言要幫容祖兒搵兄弟團「抄牌」，阿嬌大笑：「ok，叫我去做ok啦。」
四位姊妹團成員容祖兒、蔡卓妍(Sa)、鄭希怡（Yumiko）同阿嬌中學同學Cindy，齊着上靚靚「姊妹裝」預早到場打點。
祖兒及阿Sa接受傳媒訪問時話，今日冇玩新郎儀式，開門利是亦已經喺前日接過。祖兒更自爆收咗double開門利是，「因為我有貪得無厭嘅精神，嗰日阿嬌、Michael、嬌媽同阿嬌老爺奶奶都有畀。」
講到今日姊妹們，會唔會有驚喜畀一對新人？祖兒同阿Sa就搞笑話會製造驚喜畀Kenny（關智斌），祖兒話：「網上聲音話想佢接到花球，我哋都好接納網友意見。」有指好似佢哋兩個急啲（結婚）喎，加上Mani都話想下隻金豬買畀佢哋，阿Sa就扮傻話：「吓！我同祖兒結婚？」兩個人仲即刻扮咀嘴。之後，祖兒仲提議Ｍani可以送咗先，「始終都有用o架，好似買樓花咁，唔係咩叫預繳啫！」
前日阿嬌註冊，祖兒亂爆金句講：「嫁出去嘅水，等如潑出去嘅女。」要Sa糾正佢話係「嫁出去嘅女，等如潑出去嘅水」先啱，笑問祖兒今晚仲有冇金句要爆？佢就笑住話覺得好驕傲，又話嗰日只係自言自語，估唔到咁都聽到，懷疑係畀人裝咗偷聽器，仲怪阿Sa嗰日反應慢，講完先至話佢知講錯，搞到阿嬌簽緊紙都話要糾正佢。
祖兒話今晚唔會飲酒，因為想記得所有moment，所以今晚頂酒嘅責任會交畀瓊姐（Yumiko）同阿嬌中學同學Cindy，仲爆Yumiko係「酒筲箕」，然後又再同阿Sa一唱一和，祖兒話今日付出嘅係感情，阿Sa就接住話仲有愛同責任。人情呢？祖兒即抵死話：「唔係要畀吓嘩！」之後再補充：「我哋媽咪都已經送咗禮，佢哋嘅錢，咪即係我哋嘅錢！」
另外，早前傳出阿Sa同男友石恆聰（Anthony）打算明年底結婚，問阿Sa男友今晚會唔會到？係咪嚟取經？佢就好正經咁話：「係嚟賀阿嬌同Ｍichael！」傳媒叫祖兒幫手催阿Sa，祖兒就即刻用口吹阿Sa耳仔，又笑住話：「吹咗喇，唔關我事o架喇！總之我一陣就上台比武招親！」阿Sa就話兄弟團幾省鏡，會幫祖兒攞Contact！
祖兒同阿Sa喺結婚蛋糕旁邊玩自轉，仲拍片擺咗上ig，但千祈唔好睇少呢個結婚蛋糕，呢個結婚蛋糕有成個人咁高，蛋糕頂仲有個堡壘。
阿Sa之前都講過，蛋糕價值接近6位數字，所以要搵埋Joey夾份，真係物重情義都重。
(綜合報道)
