2010年港姐冠軍陳庭欣(Toby)今年初被爆與律師唐偉倫分手，之後極速戀上現年40歲、坐擁美容王國、身家過億嘅楊振源（Benny）。
拍拖9個月嘅Toby同Benny發展得好快，Benny愛得好高調，完全唔介意同朋友分享喜悅，早前將facebook頭像換上同Toby嘅攬攬合照，Toby仲擺出心心示愛。
今日有周刊報道指二人計劃明年拉埋天窗(相關新聞:https://goo.gl/8CBDbK)。
Toby今日接受傳媒訪問時話﹕「真係暫時未有計劃啊！希望事業同愛情同樣順心！謝謝大家關心。」問到男友係咪嫁得過？Toby就好冧咁話﹕「剛剛問啦，佢(Benny)話佢自己嫁得過(一個滴汗emoji)。」
Toby否認與Benny同居，話自己一直同家人及3隻鸚鵡同住，對於換50萬寶馬新車，Toby解釋﹕「之前講過，係爸爸計過舊車是時候換，不安全，所以爸爸安排的。」
Toby雖然否認同居，但見Benny喺豪宅搞朋友聚會時，Toby亦係以女主人身份出現，與Benny穿上同款T恤，Toby着埋貼身短褲，明顯已融入家中。
而報道亦指Toby已見過Benny嘅家長，仲同兩個仔亦相處融洽，相信要做楊太亦冇難度啦！
(綜合報道/apple daily)
