【正式升呢做賴太】奶奶激讚阿嬌!

    37歲鍾欣潼(阿嬌)正式升呢做賴太!今日跟台灣「醫界王陽明」賴弘國在尖沙嘴舉行註冊儀式,一對新人於4時10分才抵會場,記者叫佢哋停低影相,阿嬌急急腳邊行邊話:「我要趕住去換衫。」(相關新聞:https://goo.gl/y7X5Rg)

    據知,註冊時間本訂於4點半舉行,約4時45分眾人才陸續步出露天場地,英皇老闆楊受成坐在第一行主人家位置,由律師主持註冊儀式。

    着deep V花裙嘅阿嬌艷光四射,當阿嬌和老公讀出婚姻誓詞時,現場傳出歡呼拍掌聲,大會更出動航拍,儀式好簡約,阿嬌宣誓後,楊受成步上主禮台,之後一班姐妹行出去同新人影相。

    親友紛紛企起身用手機拍照,大家都戥阿嬌開心。

     

    榮升賴太嘅阿嬌深得老爺奶奶歡心,在註冊儀式舉行前兩老去洗手間,傳媒要求佢哋合照,兩人都好大方,問到新任奶奶覺得阿嬌點?賴老太笑容滿面表示:「很喜歡她,很棒!」再問想唔想快啲生寶寶?佢笑笑口冇答,身邊人則說:「唔好阻住,佢哋想去厠所。」

    「龍虎豹蛇」好姊妹容祖兒、蔡卓妍(阿Sa)同埋鄭希怡(Yumiko)當然都有出席!佢哋下午4點左右陸續到場,祖兒梳起頭髮着住長裙及戴上黑手套同着住4、5寸高嘅鞋,打扮成個貴婦人咁。問佢送乜畀一對新人時,佢話:「冇乜特別,我送咗成個人畀佢。」因為現場保安唔畀傳媒做訪問,所以祖兒都唔可以企定定接受傳媒採訪,講完幾句之後入咗去會場。

    阿Sa就着住貼身上衣襯間條長裙現身,佢見到現場咁多記者,都有揮手打招呼,而Yumiko就同埋老公一齊到賀。

    古巨基老婆Lorraine近日傳有喜,基仔今日同老婆都有嚟,着住鬆身衫嘅Lorraine,步伐輕盈,但同基仔相隔10幾個身位,記者叫佢哋一齊影相,但基仔話:「佢話唔同我一齊影相喎。」

    另外,到賀嘅仲有小豬羅志祥整容女友周揚青同關智斌等等,周揚青同阿嬌係老友,今日佢染晒金毛着住紅衫,一見記者影相即急急閃身入會場。

    (綜合報道)

    SHARE