鄭嘉穎、何遠東和周秀娜等人為有份演出嘅新片《葉問外傳：張天志》，今日喺深水埗舉行見面會，何遠東喺戲中本來有場戲係要姦殺周秀娜，o依家拍唔到，搞到何遠東話覺得好遺憾，嘉穎都話：「最後八爺（袁和平）改咗劇本，o依家變咗係我殺，但係我都好遺憾，因為我都好想睇吓佢（何遠東）嘅反應，嗰陣我哋都有研究過，佢仲示範咗好多個反應，個個都好可愛！」
將為人父嘅鄭嘉穎，唔知會唔會因為做咗爸爸，只係會做好人角色？佢就話：「咁又唔會喎，可以做反面教材，相信佢細細個會知老竇做邊行，做演員最緊要睇嗰個角色有冇得發揮，唔會分正、反派。」何遠東讚嘉穎事事親力親為，覺得對方好專業。
今年聖誕節鄭嘉穎會去美國登台，笑言繼續搵奶粉錢，講到係咪買定禮物送畀老婆陳凱琳？嘉穎話：「我噚日先問佢想要乜嘢禮物，點知佢話互免，大家都費事送，我唔知佢係咪戙我？之前我都有問佢生完想要乜嘢禮物，佢都係話唔使，真係唔知係咪戙我，所以等我再諗吓先，反正都有時間準備。」
周秀娜喺戲中被殺一幕，喺開工第一日就拍，導演袁和平要求真打，結果被嘉穎摑咗3把，笑言摑出感情：「冇就住拍，每把都到位，嘉穎係漸進式，最初用手指，跟住用掌心，最後用手掌，本來3把之後仲想試多個，但我塊面已紅同埋好㷫，成塊面腫咗，第一日佢已經畀我一個紀念！」
(apple daily)
