藝人林師傑同歐陽巧瑩（Tammy）上月23日結婚，兄弟姊妹團加埋有9男7女，姊妹團有蔚雨芯、麥美恩、朱晨麗及劉佩玥等，至於兄弟方面，則有譚俊彥、周志康、羅天宇等，而圈中好友何雁詩、洪永城及許家傑等，亦有到場。
場面十分感人，Tammy都未見過佢咁緊張：「佢攬住我嘅時候，佢個身都發熱、成身震晒，feel到佢都真係緊張同想喊，點知到訪問嗰陣就嚟料。」Tammy仲話：「哎呀，我第一次見你咁咋，好得意呀，你又成日好尷尬同手足無措咁，好搞笑呀！」
林師傑當晚仲準備咗一首叫《美麗的你》嘅歌道畀太太，真係好Sweet啊！
隔咗大半個月，佢哋終於抽到時間去馬爾代夫度蜜月兼慶祝「拍拖」4周年！
尋晚深夜佢兩公婆齊齊喺自己嘅社交網晒股，相中見佢哋喺馬爾代夫水上屋前嘅泳池裸泳，對住一望無際嘅大海，啲水仲清到見底，成個環境都好正！
歐陽巧瑩留言話多謝老公完成左佢十八歲嘅心願：「成個2018叉足電，返香港搏殺半個月，一月再出發蜜月（容許我地放肆一下😅呢度實在太正喇 ）。」
林師傑就留言打咗歌手鍾舒祺《裸泳》嘅歌詞，仲講愛的宣言，話同老婆以後都要坦誠相對，路至會行得遠。
唔少網民都好羨慕佢哋，有人留意到佢哋個屁股仔同背脊已經曬到兩截色，睇嚟佢哋呢幾日好盡情咁享受陽光，大家見佢哋咁幸福都好期待佢哋嘅愛情結晶品，唔合佢哋今次會唔會兩個去三個返呢！？
(綜合報道/IG/on.cc)
