方力申（小方）昨日喺尖沙嘴出席服裝品牌活動，佢話暫時完成手頭上拍攝工作，預告今年會過一個lonely Christmas，因為今年顧及工作又要搞游泳班，完全冇時間搵另一半。
小方話出年會畀心機識伴侶，佢話：「覺得悶吖嘛，為咗事業拼搏之餘，每個人都有心事，都想搵人分享，o依家只係自己同自己分享，但我唔會自己同自己講嘢，所以同屋企人住。」至於點解突然的起心肝搵女友？佢解釋：「有睇開流年，師傅話我出年好適合主動去識另一半，今年即使有都唔係好，出年就會事業愛情都好。」
係咪舊愛都搵到好歸宿又幸福，因而激發佢想快啲結識女友？小方話：「唔需要同人比，人哋快樂唔代表自己快樂，自己快樂可以影響身邊人，主要睇自己。」
至於舊愛鍾欣潼（阿嬌）即將結婚，有冇請佢飲？佢就：「啱啱返香港，冇check email，唔會假設性回答。」
另外，同場仲有李佳芯、袁偉豪，提到黃子恆食女事件牽連李佳芯喺緋聞之列，佢話：「我一向冇乜緋聞，無端端傳咗我，多咗棵緋聞樹，希望只係做樹底嗰啲，我哋以前係同一經理人，大家有飯局聚會，佢係我前輩，正常交往講一啲戲劇溝通，冇其他。」
之後講到李佳芯同袁偉豪近日頻頻出來賺外快，袁偉豪話：「年尾要積穀防饑，老婆唔食，阿媽都要食。」李佳芯就話好難得出嚟搵外快，順便為自己拉票。台慶頒獎禮戰衣嘅安排，李佳芯話：「仲未準備好，人人都戥我擔心，唔會好性感。」然後佢自嘲冇身材：「露前露後都差唔多，但我會話畀大家聽，驚大家分辨唔到，效果一樣。」
本來袁偉豪諗住幫李佳芯解圍，點知李佳芯突然話想睇袁偉豪着蘇格蘭裙，但入面唔着任何嘢好free咁，仲話：「人哋話唔着鞋都可以輕鬆啲，想睇吓你咁樣可唔可以緩和緊張氣氛。」袁偉豪話：「換完着過去過去畀你過目啦，大家都係將軍澳福利會。」
（Apple daily）
