薛家燕今日喺尖沙嘴出席珠寶店開幕活動，家燕姐啱啱舉辦完紅館演唱會，問佢有冇休息？家燕姐就話：「休息咗一日，開完騷興奮到天光先瞓得著，收到好多朋友嘅訊息，用咗大半年時間去綵排，希望大家欣賞。放假嗰日瞓醒咗想約朋友去街，但係個女叫我喺屋企休息，之前壓力好大，啲人都話我瘦得好快，瘦咗10幾磅。」
家燕姐仲爆咗瘦身秘訣，佢話：「第一就係食健康餐，多謝張玉珊；第二係呂良偉，佢用200幾萬買咗部機喺佢公司，親自打畀我，叫我隨時可以去試；第三係多謝自己嘅勤力，每日跳舞超過4個鐘頭，好多運動；最後就係壓力，令到個人好緊張，所以會瘦。但係呢個唔係咁健康，所以我都即刻走咗去做body check，抽咗血。」
唔知男朋友又有冇心痛？家燕姐就話：「又唔可以講係心痛，佢係緊張，由頭到尾又唱又跳，怕我唔夠氣，叫我唔好咁搏，不過我好enjoy個過程，鍾意又唱又跳。」家燕姐透露聖誕節會一家人包括男朋友，一齊去旅行放鬆吓，問到會去邊度？家燕姐就好神秘咁話：「人哋唔識去嘅地方。」
另外，性感現身嘅白雲就話有意創業，正在努力搵錢，仲積極準備考潛水教練牌，為冇工作嘅時候作好準備。佢仲話同老公都係獨立個體，好享受做自己想做嘅事，白雲亦謂唔介意性感。
講到之前被盜用相片宣傳一事，白雲話：「性感唔係罪行，要尊重女性，以前我唔會反抗，o依家會講。」佢仲覺得大家唔應該用性感嚟標籤人，亦唔好因為結咗婚而覺得佢唔檢點：「女性都有自己嘅權利，我老公從來都唔會話我太性感，有啲相仲係佢影同執相添！」
(Apple daily)
