藝人余德丞（Dickson）日前孖住蔡思貝一齊主持旅遊節目《緬甸奇幻旅程》，有傳二人因拍節目撻着。
Dickson仲毫無避忌喺社交網上載二人親密合照，佢更合上眼，好冧咁將頭挨落對方膊頭，畫面十分甜蜜。
連好多網民留言話以為佢公開戀情（相關新聞：https://goo.gl/SAinYK），不過佢其實係為二人節目拉票，仲話思貝係最佳拍檔！
余德丞同劉佩玥(Moon)今日在跑馬地出席馬會活動，喺今年嘅台慶頒獎禮，余德丞同蔡思貝提名最佳拍檔獎項，蔡思貝揚言想一齊攞獎，余德丞話：「我都想，難得我第一個旅遊節目，又遇到好拍檔，攞埋獎就圓滿，但對手好強，好唔容易。」
Dickson今年8月喺球場暈倒，幸好最後大步檻過，Dickson話暫未正式接拍節目，不過明年有機會同蔡思貝再拍旅遊節目：「有個要求等佢留番長頭髮先，靚好多，唔留長頭髮唔同佢拍，我話嘅！」聽佢語氣，擺明鍾情長髮女仔，余德丞話：「我鍾意運動型女仔，但佢太短喇，依家唔係唔靚，但長頭髮靚啲。」
今日係Moon人生第一次入馬場，佢曾經同朋友夾份投注，亦收過叻哥陳百祥嘅貼士，雖然最後冇落注，但叻哥就贏馬萬歲請大家食飯，都係幸運一種。Moon仲話之前去俄羅斯拍攝曾經騎過馬：「人見到陌生人都要慢慢嚟，所以聽取意見，摸吓佢拍吓佢，心入面同佢講，多謝你畀我企喺你隔離，等隻馬感覺到我友善。」
(綜合報道/Apple daily)
