近年經常有乘客大鬧機場或機艙，行為令人側目又討厭，估唔到今次輪到佢！經常穿梭中港台嘅佢，日前由香港坐飛機返台北，喺空姐臨閂機艙門之際，佢一句話要攞番件寄艙行李，阻礙空姐工作不特止，仲要搞到全機乘客等佢一個，最後令航班延誤咗成個鐘，唔少同機乘客都怨聲載道。
（相片由讀者陳小姐提供）
當晚同機嘅讀者陳小姐向《蘋果日報》報料指，當時乘坐晚上10點55分，由香港往台北嘅航班上，台灣男星林志穎乘坐商務客位，同佢同行仲有3人，陳小姐話︰「當時所有乘客已經上晒機坐定定，空姐準備要閂機艙門，林生突然提出話要攞番件寄咗艙嘅行李，雖然佢態度OK，但佢咁樣搞一搞，成班機都delay咗，好自私。」
（相片由讀者陳小姐提供）
陳小姐表示當時機上幾位空中服務員，處理得好好，陳小姐話︰「空姐要求林志穎佢哋要有一位乘客落機去認領番件行李，咁都好合理吖，唔係邊個去攞？冇理由叫空姐去攞。」
陳小姐仲話︰「落機嘅乘客係林志穎同行嘅其中一人，而佢自己就冇落機，人同行李落咗之後，空姐就即刻閂門，班機先開到，前前後後搞咗成大半個鐘。」陳小姐覺得林志穎作為藝人、公眾人物，行為舉止更加要自我檢討，「佢係藝人，唔係大晒，坐商務位啫，就算係坐頭等位都唔代表你有特權，其他乘客嘅時間，唔係時間咩？要全機人等佢，好過份囉！」
(apple daily)
