準新娘鍾欣潼（阿嬌）今日到電台宣傳新歌《聽說的幸福》，見她清減不少，證明近日狂操收身成功！
講到新歌，她興奮指誠邀內地著名唱作人汪蘇瀧作曲、作詞，更是入行後最感動的作品，每次聽到都會眼濕濕：「想喺水底拍婚紗個Video嘅背景音樂係我唱，所以就有呢個諗法，送首歌畀老公。」
續自爆守唔住秘密，一有歌就即刻告知未婚夫賴弘國。
「咁就冇咗個Surprise。（點解唔搵老公拍MV？）有諗過㗎！但佢嗰陣唔喺香港唔得閒。」
阿嬌透露婚禮當日會播放這首新歌，又抵死笑話特意安排播另一個版本的MV：「會剪走個男主角，好尷尬㗎嘛！諗過送畀老公嘅，但就見到第二個男人！（唔再拍一個有老公嘅MV？）冇時間！」記者笑問是否有時間都寧願去操Fit？
她笑住大呻其實好辛苦，因為沒有健身習慣，相反老公就有，全靠「堅持」捱過一切：「試咗一條婚紗，竟然着到喎！本身唔想試嘅，因為太細件，但依家仲要改窄，都好開心！仲有啲未試嘅，嗰啲仲細件！（減咗幾多磅？）唔係睇磅數嘅，係想要線條。（想再突顯邊部分線條？）手臂同腰，因為都睇唔到腳嘅！」
問到有否從健身找到樂趣，阿嬌即大笑話冇樂趣：「教練都有叫我結完婚繼續堅持，但結完再算！覺得自己已經算叻㗎啦！」而今次健身都有意外收穫，成功做到正面影響：「我願意將自己嘅肥攞出嚟同人分享，Set一個目標，知道有好多女仔未必都係鍾意做運動、健身，但見到我做運動，佢哋就去做，慢慢一步步咁，好有鼓勵性！」
講到好姊妹容祖兒日前自爆接受「雪卵」手術，於2年前亦有「雪卵」的阿嬌透露是經理人霍汶希（Mani）提議二人，都唔知Joey之後都有去做，更自爆當年自己只雪得3粒卵子：「嗰時做完荷爾蒙失調，肥咗20磅減唔到，好辛苦！所以醫生叫我再做都唔考慮，仲辛苦過依家！（私下有同Joey傾呢件事？）冇呀，只可以話佢冇肥到！（會叫埋阿Sa一齊雪？）問佢啦不如，我唔知呀。」
（on.cc）
