藝人鍾欣潼（阿嬌）將於20日與賴弘國於香港補擺婚宴。
最近佢就積極收身，仲喺網上PO片同大家分享減肥進度。
「阿嬌婚前減肥日誌」片段
工作方面，除咗之前同賴弘國一齊拍內地真人騷《爸媽學前班》之外，佢更一直忙着籌備新專輯！
今日就推出情歌《聽說的幸福》。佢坦言好感恩能夠擁有這首歌，不過令佢感恩的對象唔係未婚夫，而係呢首歌嘅作曲、作詞人，內地著名唱作人汪蘇瀧。
阿嬌話：「汪蘇瀧係我一直好喜歡嘅歌手，覺得佢寫嘅作品好甜蜜，所以我就send message畀佢，問可唔可以幫我寫首歌呢？其實我哋之前係未合作過，不過佢好快答應咗，真係為我哋度身訂造，首歌仲寫得好好，本身自己都唔算眼淺，但一收到嗰陣感動到想喊，應該話遇到呢首歌係另一種幸福！」
MV描述一對情人相處的點滴，阿嬌話同另一半係異地戀，所以MV情節除左交代二人一齊相處嘅時光，仲有為另一半執行李、夜晚煲電話粥或者視像通話，就算去到邊都會影張相同對方分享。
其中一幕，男方下廚煮公仔麵，阿嬌即聯想起老公賴弘國為自己做過同類型事情，她說：「好多時我哋各自分開去工作，呢種情況下要維繫確係有難度，平時我哋好着重分享自己生活，最重要係唔好畀遠距離去影響到段關係。」
MV結尾，阿嬌手寫一句英文藝術字「You love me. I love you. That’s all that matters.」原來她於現場即學即寫，現場工作人員都大讚寫得有板有眼，寫嘅時候表情仲好冧，真係幸福滿瀉！
(綜合報道/on.cc)
