而對於今次阿澤出手相助，心美表示衷心感激：「我真係要衷心多謝杜汶澤先生，我完全唔知點多謝佢，我有話請佢食飯，但佢就好輕描淡寫咁話『我只係打咗幾個電話，不用言謝。』佢咁樣令我更加感激佢。。。」
黃心美昨日喺FB度PO咗篇「尋找表哥的故事」嘅文，表示爸爸一直以來都好想搵番失散咗20幾年嘅表哥（即係心美姑姐個仔），而噚晚心美同爸爸食完飯後，爸爸又再一次提起呢件事，所以自己就喺「有限」嘅資料下，喺fb同ig story度出post，淨係知道佢表哥讀男拔，訊息少之有少。之後強尼睇完佢嘅post就同佢講「杜汶澤咪讀男拔」，但心美基於自己同阿澤唔熟，所以都唔敢搵阿澤幫手，點知隔咗一陣，阿澤就主動喺fb度覆美心話佢已經幫手搵緊，之後阿澤仲俾咗一個佢表哥以前用過嘅email俾心美，當刻心美就高興到喊咗出嚟。
當阿澤得知呢個email係冇用之後，佢就話唔緊要，仲話已經「吹行晒雞」幫佢搵表哥，最後皇天不負有心人，終於搵到啦！阿澤喺傍晚時間覆心美話透過一個網站搵到佢表哥，而之後當表哥回覆心美嗰陣，心美又再一次開心到喊。
表哥嘅回覆！
事後心美表示，自從姑姐過身後，因為表哥跟咗自己爸爸生活，之後又去咗外國讀書所以失聯20幾年，心美指爸爸已經同表哥通過電話：「頭先表哥打俾佢傾咗10分鐘左右，表哥o依家喺倫敦做嘢、生活，我都有問爹哋有冇喊，佢話冇，咁大年紀唔適宜太開心太興奮，但我都feel到佢係好開心。」而心美又話爸爸好多謝杜汶澤：「佢都好多謝阿澤同喺呢件事上幫過手嘅每一位，其實由噚晚出post後有乜消息我都有keep住update我爹哋，我今日同佢講話喺LinkedIn呢個地方搵到表哥，跟住爹哋見到佢寫嘅背景各樣，然後佢就同我講『真係好多謝杜生！』，搵唔搵到，最終見唔見到面都好，最少起碼佢知道表哥o依家係一個出色嘅人。」至於爹哋有冇約表哥見面？身在澳門嘅心美就話唔知：「但我啲妹就個個都好興奮，話不如組團去倫敦搵表哥。」
而對於今次阿澤出手相助，心美表示衷心感激：「我真係要衷心多謝杜汶澤先生，我完全唔知點多謝佢，我有話請佢食飯，但佢就好輕描淡寫咁話『我只係打咗幾個電話，不用言謝。』佢咁樣令我更加感激佢，佢真係好好，同埋一班讀男拔、同我素未謀面嘅人去幫我，太多謝佢哋喇，其實唔係淨係我開心，因為我爹哋始終大年紀，佢已經係一個無慾無求嘅人，佢多次同我講好想搵番表哥，證明佢真係好想好想，而今次終於做到，我兩次眼淚都係戥我爹哋開心。」
佢之後仲喺社交網多謝幫過佢嘅人：「表哥嘅回覆令我流咗好多開心感動嘅眼涙。呢幾年我每次去拜姑姐都會叫佢保佑我幫daddy搵番表哥，依家終於搵到嘞。衷心多謝你杜汶澤先生，由尋晚出post到依家唔夠廿四個鐘幫咗我一個我無以回報嘅大忙。亦衷心感激每一位同我素未謀面仍然願意喺呢件事上幫我一把嘅人。I just can’t thank you enough。我啱啱已經同表哥交換咗電話，我保證以後唔會再同佢失去聯絡。」
真係好感動！
(綜合報道)
