藝人陳茵媺（Aimee）出席慈善晚宴，講到大仔12月4日生日，會送甚麼禮物給他？她說：「佢五歲啦，時間過得好快，其實佢每年都有要求要咩禮物，佢今年想要玩具氣槍，但我又唔係主張屋企有類似武器嘅嘢，雖然係玩具槍，係小朋友可以玩果種，喺外國好流行，但我就有啲驚，始終屋企仲有兩個細嘅，驚佢亂嚟。」
不過她表明就算肯買，都會跟大仔約法三章：「要佢做完功課先可以玩，同埋淨係可以瞄準一個目標，但唔可以瞄準人。（咁瞄準老公陳豪呢？ ）唔得，佢爹哋受傷邊個睇住小朋友，總之唔可以射人，指着公仔就得，所以我都諗緊買唔買畀佢。」
除了玩具氣槍，她謂還會買畫具給兒子：「佢都鍾意畫畫，咁我就可以買靜同動嘅禮物畀佢。（係咪小朋友想要乜嘢都盡量滿足佢哋？ ）我會呀，小朋友有獨立嘅思想，我會用成人嘅處理方法，但要聰明處理，作為媽媽，有獎勵之餘，都要同佢講有啲乜嘢唔可以做，咁樣先可以係雙贏局面，如果佢係要真槍，就真係唔會畀佢。」
Aimee續說：「（佢哋有冇試過過分要求？ ） No ！可能仲細個，要求比較簡單，佢哋想要啲冇可能得到嘅嘢，都仲可以氹到佢哋，遲啲可能就氹唔到。（淨係送禮物畀哥哥，細佬妹會唔會呷醋？ ）唔會，因為係大哥生日，佢會識得同細佬妹分享，佢哋三個好Friend，可能年紀好接近，識得Share同埋互相照顧，我好Lucky。」
問到她外出工作，誰人照顧三名子女？她說：「叫咗奶奶同老公睇住，老公啱啱放工，夾啱時間，放心啲。（佢都幾辛苦，放工仲要湊小朋友？ ）我覺得自己好Lucky，有佢幫手。」
（綜合報道 / on.cc）
