39歲的歌手王菀之於2015年下嫁給「Figure王」蘇卓航（Eric So），人前人後二人表現恩愛，相當甜蜜！
話咁快二人結婚已經三年，為咗慶祝結婚三周年，兩公婆就去咗日本旅行，佢哋去原宿又去下北沢，玩得相當開心！
王菀之喺社交網上載咗一張合照，二人後方有一大個「LOVE」字，加埋王菀之笑到見牙唔見眼個樣，真係一切盡在不言中！
王菀之仲留言：「就係咁，我姓咗蘇三年喇 #2015年11月28日。」圈中好友楊千嬅都有留言送上祝賀。
另外，王菀之又上載一張拎住一條超細嘅牛仔褲相，並表示：「呢排瘦咗少少，呢條ok！」
結果Ivana呢張相同發文都引起網友好多揣測，指佢有所暗示，有網民就留言問佢係咪有喜，部分更直接留言恭喜佢送上祝福，又有啲向佢查詢BB嘅性別添！唔知Ivana同佢老公幾時正式公佈喜訊呢？
(綜合報道 / on.cc)
