郭可盈婚後專心相夫教女，不時都喺網上分享親子樂嘅相，一班網民隔住Mon都感受到佢哋幾咁幸福滿瀉！
近年鮮有於幕前現身，只係日前出席過公開活動，期間佢提到自己唔會復出拍劇，因為寶貝女林天若（乳名津津）唔會放過自己。
昨日係郭可盈嘅49歲生日，日前已經見佢喺微博貼過相慶祝，昨日係正日，當然要食餐飯啦！
昨晚可以陪到郭可盈過生日嘅，除咗有佢老公林文龍同囡囡津津之外，仲有細佬郭可頌、弟婦熊黛林及一對孖女Kaylor同Lyvia，另外仲有其他家人，夾夾埋埋一家大細，有成10幾個人咁多，非常熱鬧！
郭可盈簡單留言話：「我要我愛和愛我的人，每年都一起《共同渡過》！」即係預約每年生日都要同屋企人過，真係好注重家庭。
睇埋佢哋枱面上嘅生日蛋糕，中式西式都有，又有唔同口味，真係食蛋糕都飽。另外，仲有啲相信係較早前郭可盈慶祝生日嘅相，唔知佢今年食咗幾多個蛋糕呢？
咁就祝郭可盈生日快樂、青春常駐，得閒就返出嚟客串吓，等啲觀眾同fans唔好掛你掛到頸都長。
(綜合報道/Apple daily)
