藝人羅霖與劉坤銘2013年離婚，育有三個兒子，離婚後靠自己養家，獨力湊大三個仔仔超犀利！所以仔仔都超錫媽咪！
藝人羅霖身穿紅色低胸裝出席《歡樂滿東華2018》記者會，她透露屆時會與十幾位華姐、港姐及亞姐一同行catwalk：「好特別，破天荒唔同選美盛事嘅佳麗一齊，係歷史性一刻，除咗我哋啲前輩，仲有好多年青貌美嘅師妹，好多靚人睇！（行catwalk有冇生疏？）都好多年冇行，有叫啲仔指正下，大仔有興趣做model，都有啲研究。」
羅霖又指最近要安撫13歲兒子的情緒，因他從一些Auntie口中得知父親劉坤銘將再婚，羅霖就話：
「阿仔知道之後忍唔住喊，佢覺得有啲hurt，我就麻木晒，冇乜影響到我，都祝福佢嘅，之前去完以色列，覺得每日最緊要開心健康，多啲工作，照顧好父母同囝囝。（如果你再婚，細仔會唔會都傷心？）應該唔會，因為我哋一齊住，講咗如果對方唔接受我啲仔，我一定唔會再婚，不過依家冇諗，起碼啲仔畢晒業先，相信我都有排孤單，不過有好多囝囝嘅愛。」
(綜合報道/on.cc)
