自從前世情人張靖(KaKa Ball)出世後，張繼聰（阿聰）已經呷醋外父上身咁，係囡囡未夠三個月就已經講到明：「諗到佢將來有男仔拖佢手我已經嬲，仲叫我準備嫁妝？我要獨霸佢十年八載。」
出哂名係廿四孝爸爸！
佢不時喺社交網分享仔仔張瞻同B女張靖嘅生活日常，勁吸Like！阿聰仲話網民follow佢IG係為咗睇張瞻同張靖兩兄妹！一邊講一邊冧笑～
呢日佢喺社交網上載一段抱住張靖嘅短片，片中可見，正當張靖專心玩緊個大水樽之時，佢拍一拍張靖，再谷起隻「老鼠仔」騷出超粗壯臂肌問：「妹妹，Daddy係咪好勁呀？」
點知阿女望咗一秒，就勁敷衍答：「好勁呀！」之後即刻擰轉頭繼續玩水樽。
阿聰留言指張靖「1秒誠懇1秒敷衍」，好多網民都留言話阿女已經習慣爸爸成日問呢啲無聊問題。
(綜合報道/on.cc)
