木偶哥林師傑，昨日同拍拖4年嘅歐陽巧瑩（Tammy）結婚，佢哋喺尖沙嘴筵開35圍，一對新人兄弟姊妹團加埋有9男7女，姊妹團有蔚雨芯、麥美恩、朱晨麗及劉佩玥等，至於兄弟方面，則有譚俊彥、周志康、羅天宇等，而圈中好友何雁詩、洪永城及許家傑等，亦有到場。
一對新人應大家要求咀足一分鐘，咀完後，林師傑就好深情咁望住老婆講「I Love You」。
至於Tammy就話同林師傑拍拖4年，都未見過佢咁緊張：「今日佢攬住我嘅時候，佢個身都發熱、成身震晒，feel到佢都真係緊張同想喊，點知到訪問嗰陣就嚟料。」而Tammy仲話：「哎呀，我第一次見你咁咋，好得意呀，你又成日好尷尬同手足無措咁，好搞笑呀！」，而林師傑就指一直聽人講搞婚禮好大壓力，但自己就一直keep住輕鬆態度去面對：「但今日見到一班兄弟姊妹去為我哋去奔波、做嘢嘅畫面，都俾佢哋感動咗。」林師傑又透露今晚已準備咗一首叫《美麗的你》嘅歌道畀太太：「不過首歌只係完成咗半首，所以今晚會同Live Band夾，我唱半首，然後另外嗰半首就講故事，而譚俊彥仲會幫手彈埋結他。」
問林師傑有冇「愛的宣言」？佢最初話唔知，但之後又改口：「其實都有安排喺起菜後講，會簡而精，而Tammy亦話自己都準備咗，已經好清楚要簡而精咁表達。」問到會唔會好快生B？Tammy就話：「未呀，唔想咁快做人阿媽，聽過好多女仔朋友講，都想享受多陣，但又知道有仔要趁嫩生，俾多兩年（時間）啦。」而林師傑又話：「係啦，儲多啲錢先，依家租金好貴，我哋兩個人都好鍾意小朋友，都擔心將來讀書嘅問題，因為屋企人用咗好多時間去栽培我，第日我哋都要花時間去栽培小朋友。」講到呢度，林師傑都開始眼泛淚光，不過Tammy見到佢咁，都仍然係話：「哎呀！好搞笑呀你！」
而為新娘做姊妹的朱晨麗，她說：「做姊妹次數唔多，只係兩次，但呢對新人儀式好創新，唔使早起身去梳頭、化妝，佢哋想大家舒服啲，而我都想佢哋早生貴子，平時佢話少飲都要佢今晚飲少少，等佢哋有成果！（幾時到你？）次次嚟呢啲場合都被催婚，遇啱就嫁啦，唔啱都冇得強求，始終一生人一次唔可以亂嚟！（送咩禮物畀一對新人？）我送咗個人嚟啦！原本我有通告，但特登請假，依家得罪晒全劇組啲人，為咗好姊妹冇辦法啦！」
兩人於晚上八時許舉行簽字註冊儀式，由雙方母親擔任證婚人，換上一襲低胸婚紗的歐陽巧瑩相當搶鏡！一對新人完成儀式後，兩人應司儀要求，即場咀嘴讓賓客拍照。
之後雙方致詞，談到屋企人時，二人都忍不住落淚，而林師傑亦有感謝星夢老闆何哲圖及無綫劇《特技人》一班好兄弟，尤其是譚俊彥的照顧。
場內佈置超有心思！
好浪漫！
(綜合報道)
