吳佩慈為百億男友紀曉波生咗兩仔一女，不過未有「封肚」，仲預告ready生第四胎：「連續生了3個小孩子，肚皮怎麼都不比從前，畢竟4年連續吹脹3次還是破壞度不小的，我得把它養好了應付生老四啊！」
佢仲直言人生已經進入「肚皮比臉皮重要」嘅階段。
訂婚四年，但仍然未正式入門。
紀曉波早前被爆新歡係大陸女星林允，令吳佩慈嘅未婚妻地位受動搖。不過吳佩慈之後霸氣宣示主權！而紀曉波都回應：「不認識她（指林允）。」
疑似偷食風波之後，紀曉波月初又被指捲入投資風波，傳出被捕消息，當時未婚妻吳佩慈即時澄清、紀曉波亦有喺網上報平安，不過吳佩慈之後就喺微博上載由律師行發出嘅聲明，指要對不實嘅報道提出起訴。
事隔約半個月，吳佩慈日前就po咗佢同紀曉波，以及北馬里亞納州長、副州長，以及同Victor Hocog嘅合照，而且仲寫住「祝賀北馬利亞納最年輕的州長Ralph Torres和搭檔副州長Arnold Palacios大選獲勝；祝賀Victor Hocog競選參議長獲勝」
相中嘅吳佩慈同紀曉波睇落都好精神，而不得不提嘅係，喺呢五張合照入面，其中一張更有埋佢哋一家五口。
不過三位小朋友個樣，就俾吳佩慈以粉紅色心心遮住。唔經唔覺，細仔Hudson已經一歲幾啦！雖然見唔到個樣，但見到身形大個咗好多！呢張合照足以證明紀曉波冇被捕之餘，佢哋感情亦係穩定。
(綜合報道/Apple daily)
