藝人鍾欣潼（阿嬌）下月喺香港同老公賴弘國舉行婚禮，佢早前出席活動時明顯瘦咗，仲話已經減咗五至六磅，不過希望再減多十磅。
昨日阿嬌就喺社交網上載一條名為「阿嬌婚前減肥日誌」嘅短片，記錄低減肥嘅血淚史，見阿嬌一嚟就飲緊花膠湯調理身體同補充力量，仲第一次透露自己嘅體重：「最近開始控制胃口，食肉同菜，我唔想減得太清，因為太清可能飲宴嗰啲一飲就醉，但就唔飲甜同戒澱粉質，加上運動。」
阿嬌表示自己依家係112磅，希望可以減5至6kg，仲叫大家要齊齊加油：「希望同想減肥嘅朋友一齊減肥 倒數一個月開始，第一次咁赤裸裸同大家分享我嘅肥，為咗着婚紗，呢個月一定要減到！」
短片仲見到阿嬌去咗健身室，大膽公開自己嘅體重數據，資料顯示阿嬌體重為51.3kg、肌肉為18kg、體脂為17.5kg，阿嬌同教練講：「我想瘦到45kg。」教練即刻勸止：「太瘦啦！太瘦啦！」但阿嬌堅持：「唔得呀，你睇嗰件婚紗條腰，係咁㗎！」跟住用兩隻手圈出「黃蜂腰」，十分搞笑。
唔係個個女仔都會願意公開自己嘅體重，真係唔容易！希望阿嬌快啲減肥成功，做個靚靚新娘子啦～
(綜合報道)
