今年《萬千星輝賀台慶》其中一個令人印象深刻嘅環節一定係「星級BB爬行大賽」。期間有BB喊，鄭裕玲就母愛上身抱BB！賴慰玲的BB一路領先，爬至半路時向後一望，被扮BB的大人嚇一嚇，即時加速向前爬，最終勝出比賽！但未知是否現場太熱鬧，好多BB都邊爬邊喊呢！
而李漫芬（Fanny）囡囡談在心都有參加！在心現時7個半月大，係比賽中年紀最細嘅BB，但在心好叻叻豬，努力完成賽事之餘，仲完全冇扭計，令媽咪甜在心，Fanny開心表示：「其實囡囡18號先正式識爬，佢一滴眼淚都冇流過，中途見到另一個小朋友喊，佢都兜過去望住對方，好似睇吓對方有咩幫手咁。」
在心雖然人仔細細，第一次出席大場合，但Fanny話佢玩得好投入，完全唔怕生保，連一眾花旦都有搵在心集郵，包括陳煒、黃翠如，連鄭伊健都有份，夠晒叻女！
講到在心對鏡頭好敏感，會唔會畀佢做小童星？Fanny就話最緊要囡囡開心：「如果佢鍾意，我都唔介意，如果拍到一個得意嘅廣告都係好好嘅留念，我都有錄低台慶片段做留念，佢叻過媽媽，咁細個上電視。」
(綜合報道/on.cc)
