前港姐李美慧（Vivi）與百億富商曾文豪於今年7月結婚，並於10月順產誕下得意B囡「小糖心」！
Vivi佗緊B嘅時候不時都會喺社交網PO相同大家分享生活點滴，就算佗B都仲係咁Fit，佢之前透露自己只係重咗10KG：「個個都問我點解仲可以咁瘦，我好俾心機去Keep㗎☺️每日食一餐有營養的，晚飯沒有應酬的話，就可免則免。不過我好少肚餓，因為有隻‘無影腳’頂住我個胃🤣到依家我一共肥了10kg」
誕下囡囡之後就少咗更新，唔知係咪因為掛住湊B囡太忙唔得閒update呢？
不過早前久未露面嘅馬賽去探佢同BB時，李美慧都有PO合照！
話咁快B囡已經滿月，李美慧「坐月放監第一個活動」就係現身慈善活動。
望落佢面尖尖咁，睇嚟已經極速修身！而噚晚佢再喺IG PO相。
原來噚日係囡囡擺滿月酒嘅大日子！
李美慧PO咗佢同老公、囡囡嘅一家三口照。
佢留言話：「小糖心滿月啦，成晚好乖，輪流招呼客人」
綁了一條粉紅色頭巾在頭上嘅B囡超可愛！其中一張相仲見到佢兩邊手仔戴咗唔少金器，真係萬千寵愛在一身！
李美慧就話:「係呀，BB噚日搞滿月宴，佢成晚好乖，冇扭計，周圍招呼客人，噚晚冇乜嘢主題，都係屋企人食飯，唔想大搞，簡簡單單。」講到囡囡身上嘅金器，佢話係親友送嘅滿月禮物。BB個樣好似媽咪咁標緻，不過好多張相都係皺住眉頭，李美慧就話：「太多人，我冇留意佢點解皺眉頭，但佢成日都皺眉頭。」
(綜合報道)
