藝人洪卓立（Ken）與湯怡日前突然在社交網宣布結束11年情，令粉絲大為震驚。
相關新聞:
【宣布分訊後首現身 洪卓立強顏歡笑 急賣…】https://goo.gl/dH8Ubh
【傳佢係第三者…爆洪卓立湯怡分手內情】https://goo.gl/S1FczK
【唔係陳家樂 湯怡同佢着埋情侶鞋一齊跑山！？】https://goo.gl/2BqEds
今日Ken首度現身出席英皇鐘錶活動，提起湯怡時更抖大氣，之後激動落淚！
Ken受訪時，主動向記者朋友講分手一事，佢指二人公布分手決定後，外間好多反應，直接影響到大家對湯怡嘅睇法，所以想為前女友澄清：「例如話佢（湯怡）紅咗少少、同我有距離就飛咗我……（開始哽咽、落淚，工作人員遞上紙巾。）完全唔存在嘅，我哋11年前一齊時，我第一隻碟都未出，都未有《彌敦道》，中間我有大病，如果佢係咁嘅人，都有好多機會同我分開，遇到好多難過嘅事情，佢都可以好輕易咁走…」之後更否認二人之間出現第三者，二人只係因了解而分開。
Ken又指自己同湯怡都覺得佢有女主角做係一個好機會，但都唔算大成功。佢續澄清逼婚一事，指兩人一早有共識35歲先考慮，所以唔存在逼婚。問到係咪心痛Kathy受盡攻擊而所以主動澄清？Ken就話作為朋友或男友都會唔開心。問到點解要公開講分手？佢話因為大家同佢哋一齊見證呢段感情，所以出個Post同關心佢哋嘅人交代聲！
Ken表示：「每段愛情都好獨特，唔好因為我哋呢段關係，而唔相信愛情，起碼我自己依然相信愛情。」對分手一事繼續發酵，甚至有傳陳家樂係「第三者」，佢話：「我私底下都有同陳家樂講唔好意思，拉埋佢落水，其實湯怡post相十張有九張都係工作嘅嘢，我就覺得冇問題，如果真係有第三者呢啲嘢就唔會咁張揚，我就明白大家都愛錫先有呢啲誤會。（係咪唔講分手原因？）冇第三者，細節唔講，始終11年感情，好難用11句或11分鐘令大家去明白，好老土但亦都係真嘅，大家因了解而分開。」
講到心情，佢坦言還好：「始終唔係開心事。（你哋同公司會經常見到？）其實我哋關係仲係好好，好和平，所以唔會尷尬，上個禮拜大家喺公司見到有聲Hi，大家都係做嘢。」
(on.cc)
