圈中有胡說八道會、少婦聯盟、仲有已經由處女黨變成嘅索爆人妻團，其實仲有一Group！就係「2LINE黨」啦～「2LINE黨」由朱千雪、同屆港姐岑杏賢同湯洛雯，加埋蔣家旻同張嘉兒組成，話係前年千雪BB喺主演劇集《EU超時任務》後，聯同幾位好姊妹組成，佢哋不時都會約食飯傾大計。
之但係，千雪BB家陣又要顧住進修，張嘉兒已為人母，幾位都已經各有發展，要齊腳食飯實在唔容易。不過，佢哋都會抽時間同姊妹見面，相約出來飯敍談心。
昨晚就見幾位「2LINE黨」嘅成員喺社交網貼相，晒飯局合照，原來今次係要預祝張嘉兒嚟緊18號嘅35歲生日，兼補祝蔣家旻喺今個月10號嘅29歲生日。幾位好姊妹分別都有喺個人社交網貼出合照，並送上祝福。
兩位壽星喺蛋糕前雙手合十許願，其中張嘉兒話要許願：「My wish is for our friendship to last and we’d be good friends forever.（我的願望是我們友誼永固和我們求遠都是好朋友。）」
而蔣家旻亦有表示，話感謝班姊妹陪伴。至於千雪BB就留言話好難先約到咁齊人，不過因為佢哋傾得太興奮，搞到佢返屋企時聲沙沙。
雖然位位都係靚女，但係最出眾必定係「靚湯」湯洛雯，着上吊帶背心嘅佢晒出香肩，真係超索！
(綜合報道)
