問到佢驚唔驚？唐詩詠手按心口、驚魂未定咁話：「好驚！我好驚係個女人…」
昨晚約10時，唐詩詠駕駛座駕途經觀塘，在apm對出嘅觀塘道發生三車連環相撞交通意外，據現場目擊人士透露，事發時有名女子突然由欄杆跳出馬路，由於當時馬路上交通繁忙，幸而唐詩詠前面嘅車輛趕及緊急煞車，並冇撞到衝出馬路嘅女子，不過，第二架車嘅唐詩詠煞掣不及，結果撞向前面座駕，唐詩詠嘅座駕車頭被撞凹了，而在佢後面嘅第三架車，亦因收掣不及撞花車身，幸好事件冇人受傷。
有途人目擊意外發生報警，唐詩詠在意外發生後，表現驚慌，呆坐車內一會兒後落車視察情況，見佢拍晒心口，驚魂未定，記者即上前慰問有冇受傷，唐詩詠說：「冇事！冇事！」並跟其他兩位車主商討情況。由於現場頗大風，唐詩詠一頭長髮被吹起，搞到「頭髮亂了」。
警察到場後，分別為唐詩詠等人「吹波波」做酒精呼氣測試。
事後問番唐詩詠，佢講番事發經過：「就係我哋行緊嘅時候，突然間前面有個女人衝出嚟，我隱約見到唔知係唔係嘅時候，開始dup車嘅時候就dup唔切，咁我哋就3車撞咗。（車頭撞毀嚴唔嚴重？）都…算啩！少少凹咗。」問到佢驚唔驚？唐詩詠手按心口、驚魂未定咁話：「好驚！我好驚係個女人…係我架車撞到前面嗰架，我驚隔籬嗰啲撞到佢，好驚呀！因為我係第一次咁樣撞車咋，即係有個人衝出嚟咁樣。」
唐詩詠又話，已經settle咗啲嘢，佢苦笑住表示：「都已經settle咗啲，好彩我唔係第一架車，如果唔係我諗我會嚇死。」
之後佢喺社交網發文報平安留言話：「大家唔使擔心，我冇事，好彩其他人都冇事，過馬路記住要用斑馬線啊，唔好貪方便貪快，真係好危險㗎！#係好驚」
睇佢咁講，應該係有途人唔跟斑馬線亂過馬路導致交通意外發生，顧己及人大家真係要小心呀！
(綜合報道/Apple daily)
